May 14, 2015

Filipinas, maika-117 maipanggep iti kasasaad dagiti umilina, kuna ti UN

Nailista iti Human Development Report ti United Nations a kadagiti 187 a pagilian iti lubong, maika-117 ti Filipinas no maipanggep iti manamnama a kapaut ti panagbiag, salun-at, edukasion ken mateggedan dagiti umilina ti pagsasaritaan.

Umuna iti listaan, kas panagsasaganadda, ti Norway, Australia, Switzerland, Netherlands ken Estados Unidos.

Adda met iti kutit ti Niger, Democratic Republic of Congo, Central African Republic, Chad ken Sierra Leone.

Iti pannakailistana a maika-117, nairagup ti Filipinas kadagiti pagilian nga adda iti sakup ti “medium human development.” Kakadua ti Filipinas itoy a grupo dagiti padana a pagilian nga adda iti Southeast Asia a kas iti Vietnam, Timore Leste, Cambodia ken Laos ken dagiti dadduma pay a pagilian a pakaibilangan ti Egypt, Paraguay, Gabon, Bolivia, El Salvador, Uzbekistan, South Africa, Syria ken Iraq.

Adayo ti nangitarayan ti Malaysia ken Thailand iti Filipinas, maika-62 ken maika-89, kas panagsaganadda, ken naibilang dagitoy iti grupo a “high human development.”

Iti panangilawlawag ni ekonomista Mahbub ul Haq, maysa kadagiti nanginaw iti Human Development Report, iti kayat a sawen ti listaan, kinunana a ti kangrunaan a panggep ti panagrang-ay, isu ti pannakaipaay kadagiti umili kadagiti nasken a kasapulanda. Ngem agparparang nga adda dagiti gobierno a makumikom iti panangragpatda iti irarang-ay ti pagilianda ngem nalipatanda met nga iburay dayta a kinarang-ay kadagiti umili.

(Naipablaak iti Bannawag, Mayo 25, 2015 a bilang.)

No comments:

Post a Comment