Ubbing a mannurat, maawis iti Young Writers Workshop

Agtawen kadi ti anakmo iti manipud iti 9 agingga iti 17 ken interesado iti panagsurat?

Amangan no interesado nga agatendar iti 2015 Young Writers Workshop nga angayen ti Bienvenido N. Santos Creative Writing Center (BNSCWC) iti De La Salle University iti Taft campus inton Abril 17, 2015, 8 a.m.-5 p.m.

Panggep daytoy libre a workshop a tarabayen dagiti ubbing a mannurat iti panangpasayaatda iti kinamanagpartuatda ken teknik iti panagsurat a mausarda ti imahinasionda.

Agwerret ti workshop kadagiti teknik iti flash fiction, daniw, ken iti panagsurat ken panagiladawan iti komiks (graphic fiction). Maiwayat ti workshop iti piksion ken daniw iti 8:30 a.m.-3:00 p.m.; iti met 1:30 p.m.-5:00 p.m. iti graphic fiction.

Adda maipaay a materiales para iti workshop ken pangaldaw. Maikkan met ti tunggal partisipante iti sertipiko ti idadar-ay.

Kadagiti interesado a nagannak, mabalin nga irehistroda dagiti annakda babaen ti panangidatag kadagiti sumaganad:

1) Sibubukel a nagan ti/dagiti nagannak

2) Pakakontakan (e-mail, telepono)

3) Sibubukel a nagan ti/dagiti annak

4) Petsa ti pannakaipasngay ti/dagiti annak

5) Eskuela ti/dagiti ubbing

6) Pakipartisiparan a kategoria: a) fiction/poetry, wenno b) graphic fiction

Limitado ti slot. Agpatingga ti panagparehistro iti Marso 25, 2015.

Iturong ti impormasion ti rehistration iti:

The Bienvenido N. Santos Creative Writing Center
Miguel Building Room 208, De La Salle University, 2401 Taft Avenue, Manila
E-mail: bnscwc@dlsu.edu.ph

Ikabil ti “Young Writers Workshop” iti espasio a para iti “Subject” iti ipatulod nga e-mail.

Adda karaip ti nasao a workshop a Book Caravan a buklen ti Storytelling Hour/Literary Reading ken Book Fair. Mabasa ken maipabuya dagiti sampol ti flash fiction ken ipabuya dagiti autor ti Fast Food Fiction Delivery: Short Short Stories to Go(Anvil Publishing), nga inedit da Noelle Q. De Jesus ken Mookie Katigbak-Lacuesta.

Maiwayat met ti book fair a pakagatangan kadagiti libro manipud iti Anvil Publishing, De La Salle University Publishing House, ken dadduma pay.

Daytoy a proyekto ket kas pangrambak iti Nailain a Bulan ti Literatura (National Literature Month). Naorganisa iti pannakitinnulong ti National Book Development Board (NBDB), UMPIL (Unyon ng mga Manunulat sa Pilipinas), ken Anvil Publishing, ken dadduma pay.

Para kadagiti saludsod, kontaken ti BNSCWC iti (632) 5244611 local 233; wenno ag-e-mail iti bnscwc@dlsu.edu.ph.


(Naipablaak iti Bannawag, Marso 23, 2015 a bilang.)