Nasurok a 600,000 nga opisial ti barangay ken health workers manipud iti 42,028 a barangay iti entero a pagilian ti mayenrolton iti insurance program ti gobierno.
Kinuna ni AAMBIS-Owa party-list Rep. Sharon Garin nga agbalin a posible daytoy mangrugi iti daytoy a tawen kalpasan ti pannakaipinget iti Kongreso ti pannakailatang ti P500-milion iti babaen ti General Appropriations Act (GAA) iti daytoy a tawen.
Kinuna ni Garin a ti Visayan Bloc iti Kongreso ti nangipinget iti nasao a pannakayenrol dagiti opisial ti barangay ken health workers iti PhilHealth.
Kinuna ni Garin a sagudayen ti Seksion 393 ti Local Government Code of 1991. Maipaayan ti tunggal barangay chairman iti di nakurkurang ngem P1,000 a binulan nga honorarium idinto a dagiti sabsabali nga opisial ti barangay, maipaayanda met iti di nakurkurang ngem P600. Gapu iti kabassit ti maipapaay a subad ti serbisio dagitoy, kinuna ni Garin a rumbeng unay a maipaay kadakuada ti ania man a tulong a manipud iti gobierno.
Iti agdama, mayenrol laeng dagiti opisial ti barangay iti PhilHealth no la ketdi kabaelan ti barangay ti mangbayad iti premium dagitoy. Ngem babaen ti alokasion, mayenrol aminen nga opisial ti barangay, ken uray payen dagiti health workers, iti PhilHealth.
(Naipablaak iti Bannawag, Marso 30, 2015 a bilang.)
No comments:
Post a Comment