“Ti saan a panagsigarilio ti agbalbalinen a gagangay a mapaspasamak iti entero a lubong,” kas kuna ti WHO Global Report on Trends in Tobacco Smoking.
Kuna ti report nga idi 2010, adda 3.9-bilion a saan nga agsigsigarilio nga agtawen iti 15 ken nasursurok kadagiti pagilian a kameng ti WHO wenno 78 a porsiento iti 5.1-bilion a populasion dagiti agtawen iti 15 ken agpangato. Manamnama a daytoy a bilang, ngumato iti lima a billion wenno 81 a porsiento iti mapattapatta a 6.1-bilion a populasion dagiti agtawen iti 15 ken agpangato inton 2025—no agtultuloy ti agdama nga ibabassit dagiti agus-usar iti sigarilio.
“Napigsa ti tignay kontra iti panagsigarilio iti entero a lubong, kas ipakita ti estadistika,” kinuna ni Dr. Vera Luiza da Costa e Silva, pangulo ti WHO Framework Convention on Tobacco Control Secretariat.
Iti sabali a bangir, kuna ni da Costa e Silva a kasapulan pay laeng ti tulong dagiti gobierno iti panakaisardengen ti industria ti tabako; iti kasta, ad-adda pay a maikabassit ti panagusar iti tabako.
“Adu dagiti pagilian a mangiwaywayat kadagiti addang tapno malapdan ti impluensia ti industria ti tabako. Ngem tapno magun-odtayo ti kalkalikagumantayo a bumassitan dagiti agsigsigarilio a 30 a porsiento inton 2025, nasken ti napigpigsa pay a kampania kontra iti panagsigarilio,” innayon ni da Costa e Silva.
(Naipablaak iti Bannawag, Abril 6, 2015 a bilang.)
No comments:
Post a Comment