Inaprobaran ti Kamara iti maikatlo ken maudi a pannakaibasana ti gakat a mangyetnag iti tungpal-biag a pannakaibalud dagiti mainaig iti illegal logging iti pagilian.
Iti House Bill ni Dip. Rufus Rodriguez ti Segunda Distrito ti Cagayan de Oro City, panggep ti gakat nga ipaayan iti proteksion, rehabilitasion ken agtultuloy a pannakabantay dagiti bakir iti Filipinas.
Segun iti naidiaya a Sustainable Forest Management Act of 2011 iti Kamara, ti panagala, panagurnong kadagiti troso ken dadduma pay a produkto iti bakir nga addaan iti gatad a nangatngato ngem P500,000 ken awanan permiso manipud iti Department of Environment and Natural Resources (DENR), maideklara nga illegal ken addaan iti dusa a tungpal-biag a pannakaibalud.
Kuna ni Rodriguez nga asino man a gumatang iti troso ken tabla manipud kadagiti illegal logger ken economic saboteur, ken mausar kadagiti proyekto nga impraestruktura ti gobierno, madusa met iti tungpal-biag a pannakaibalud.
Kuan ni Rodriguez a mapukpukawan ti pagilian iti rekursos naturales iti aggatad iti P48.6 bilion iti tinawen gapu iti panagtroso ken illegal a panagpukan kadagiti kayo iti bakir.
(Naipablaak iti Bannawag, Enero 16, 2012 a bilang.)
No comments:
Post a Comment