Tapno maliklikan ti pannakaibuis dagiti biag no adda kalamidad, kiniddaw ti Dept. of Environment and Natural Resources (DENR) kadagiti opisial dagiti amin a local government unit (LGU) nga ikkanda koma iti naan-anay nga atension dagiti geohazard map dagiti bukodda a siudad, probinsia ken ili agingga iti agpang ti barangay.
“Malaksid a mausar dagitoy iti panagplano, makaisalakan pay iti biag dagitoy a mapa,” kinuna ni DENR Secretary Ramon J.P. Paje mainaig kadagiti geohazard map a kunana a naibunongen iti 1,600 nga ili ken siudad ken iti agarup 4,000 a barangay iti sibubukel a pagilian.
Nailanad kadagiti geohazard map dagiti lugar a dakkel ti posibilidadna a malayus, agreggaay, wenno mabalin a madidigra no kasta a dumteng ti ginggined.
“Kiddawek ngarud kadagiti pangulo dagiti gobierno lokal a dida koma ipapaigid dagitoy a mapa nga intedmi kadakuada nangruna kadagiti makasakup kadagiti lugar a naitudo a nalaka a madidigra tapno maipakatda dagiti nasken nga addang, sakbay, bayat, ken kalpasan ti kalamidad,” innayon ni Sekretario Paje.
(Naipablaak iti Bannawag, Enero 9, 2012 a bilang.)
No comments:
Post a Comment