January 2, 2012

5,000 a trabaho para kadagiti Pinoy, agur-uray iti Nigeria

Inrekomenda ti Department of Foreign Affairs (DFA) ti pannakaibabawi ti deployment ban kadagiti overseas Filipino worker (OFW) iti Nigeria nga agepektibo itoy Enero 1, 2012 gapu iti panagsayaat ti situasion ti seguridad iti Niger Delta.

Nailanad iti surat ni DFA Secretary Albert F. del Rosario ken ni Labor and Employment Secretary Rosalinda D. Baldoz a maibatay iti panagadal ti departamento iti kasasaad ti seguridad iti Nigeria ken Niger Delta, maibilang a naurnos ken natalinaayen ti situasion iti nasao a pagilian iti Africa.

Segun pay iti DFA, awan metten dagiti insidente ti panagdukot wenno panagkidnap iti Nigeria, ken maisaksaknap metten ti demokrasia para iti pagsayaatan ti ekonomia daytoy.

Kuna pay ni del Rosario a segun iti naawatna a report manipud ken ni Philippine Ambassador to Nigeria Nestor Padalhi, adda 5,000 a trabaho nga agur-uray kadagiti skilled OFW kadagiti industria ti langis, petrolio ken kontruksion iti Nigeria.

Maipalagip nga impaulog ti gobierno ti Filipinas ti deployment ban iti Nigeria, gapu iti nagsasaruno a panagkidnap, a nakabiktimaan ti sumagmamano a tripulante a Filipino idi 2006 agingga iti 2009.

Naammuan nga adda 7,240 a Filipino ti adda iti Nigeria iti agdama.

Rambakan itoy a tawen ti Filipinas ken Nigeria ti maika-50 nga anibersario ti diplomatiko a relasion dagiti dua a pagilian.

Iti sabali a bangir, dinawat ti DFA iti aganay a 5,000 nga OFW iti Syria a tungpalenda koma ti naiget a bilin ti gobierno a mandatory repatriation wenno ipapanawdan iti Syria gapu iti kumarkaro situasion ti seguridad iti nasao a pagilian.

Kuna ni DFA spokesman Raul Hernandez a saan koma a mapasamak ti nagpasaran idi iti Libya nga adu a Filipino ti nagpaibati ken di nagawid iti Filipinas.

Imbalakad ni Hernandez kadagiti Filipino a mapanda iti embahada ti Syria tapno naparpartak ti pannakaproseso ti panagsublida iti Filipinas.

Sakbay daytoy, inyetnag ti DFA ti level 4 ti crisis alert iti Syria, gapu iti agtultuloy a riribuk iti nasao a pagilian. No Alert Level 4, ibaklay ti gobierno ti amin a gastos iti panagawid dagiti OFW.

(Naipablaak iti Bannawag, Enero 9, 2012 a bilang.)

No comments:

Post a Comment