January 23, 2012

Panagsukisok iti agrikultura, nakiddaw nga ipuonan ti turay

Agpuonan koma ti turay para iti panagsukisok ken pannakapadur-as ti agrikultura tapno maluktan ti ad-adu pay nga oportunidad iti trabaho iti nasao a sektor ken maparegta ti panagdur-as ti ekonomia ti Filipinas.

Daytoy ti kiniddaw ni Dip. Rodolfo Biazon (pannakabagi ti Muntinlupa City) itay lawasna idinto a kunana a nupay sitatalinaed a pagsadsadagan ti ekonomia ti pagilian ti agrikultura ken maysa a napateg nga industria a mangipapaay iti trabaho iti agarup kagudua ti populasion dagiti mangmangged a Filipino, nasken koma nga ad-adda pay a mapadur-as daytoy a sektor.

Kuna pay ni Biazon nga iti laksid ti panangikagumaanan dagiti ahensia ti gobierno ken institusion ken iti tulong dagiti non-government organization, agtultuloy ti panangsurot dagiti mannalon kadagiti duogan ken tradisional a wagas ti panagtalon imbes a dagiti baro a teknolohia a mangipaay iti ad-adu nga apit ken ganansia kadagiti nadumaduma a negosio iti agrikultura.

Innayon ti diputado a ti nakiddit a panagipuonan iti panagsukisok ken panagpadur-as ken panagkurkurang ti pannakaiwayat dagiti teknolohia para iti agrikultura dagiti kangrunaan a makagapu no a kaaduan kadagiti babassit ken marigrigat a mannalon ti agtaltalinaed a nakurapay.

Kuna ni Biazon a saan a rumbeng nga agtultuloy ti kastoy a kasasaad ti agrikultura iti Filipinas nangruna ket pumarpartak ti idadakkel ti populasion iti pagilian.

(Naipablaak iti Bannawag, Enero 30, 2012 a bilang.)

No comments:

Post a Comment