January 21, 2012

Ti Makunami

Adda iti Pusona ti Bannawag

Idi addaak pay laeng iti elementaria idi kalkalpas ti Maikadua a Gubat, adda store-mi idiay tiendaan ket no simmangpeten ti Bannawag, itarayko a mapan ilako kadagiti bario. Beinte sentimo laeng ti bayadna idi. Adda pay tay “Silaw” a nakaipablaakan dagiti napipintas a nobela a kas iti “Ti Nagbutbutngan iti Sierra Madre,” “Singin ti Sinukuan,” kdp.

Adu ti nasursurok a nababagas a balikas iti kababasak idi iti Bannawag ta ibilangko idi (ken uray ita) ti Bannawag a maysa a pagadalan iti ruar ti eskuelaan.

Ket siak, mano a tawenkon nga agbasbasa ken agsursurat iti saggabassit ta makumikomak met iti trabaho, ngem limtuad ket limtuad latta manen ti riknak nga agikur-it ket kaslaak pay ketdin maysaak nga addict ngem saan nga iti droga no di ket iti panagsurat ta uray addaak iti miting, seminar wenno komperensia, adda latta nga agsalsala ti plumak ket ti agubbog iti murdongna, i-encode-konto kalpasanna iti kompiuter.

No asino ngata ti kalakayan nga agbasbasa ita iti Bannawag, maysaak kadakuadan ta adda ngatan sisenta singko a tawenen nga adda laeng a kanayon iti pusok ti Bannawag!

--Judge JOVEN F. COSTALES (Ret.)
Naguilian, La Union

(Naipablaak iti Bannawag, Enero 30, 2011 a bilang.)

No comments:

Post a Comment