Ginutigot ti Department of Education (DepEd) iti Cordillera dagiti eskuela iti rehion nga ipakatda ti sistema ti urban gardening tapno maitultuloy dagiti programa iti panagpamakan kadagiti estudiante bayat a maipaspasagepsep ti kinapateg ti pannangan kadagiti makapasalun-at a taraon.
Kinuna ni Deped-Cordillera Medical Officer Dr. Angeline Calatan itay nabiit a marigatan ti sumagmamano kadagiti eskuela iti rehion, nangruna kadagiti urbanisado a lugar a kas iti Baguio City ken La Trinidad iti Benguet, ken Tabuk City iti Kalinga, a mangitultuloy iti “Gulayan sa Paaralan Project” gapu iti kinakurang ti espasio a pagmulaan.
Nupay kasta, kinunana nga adda dagiti rumrumuar a sistema ti praktikal nga urban gardening a mabalin nga ipakat dagiti eskuela, nangruna iti panagmula iti nateng.
Innayon daytoy nga iti urban gardening, mabalin a mausar dagiti diding dagiti pasdek a pagisab-itan kadagiti masetera ken kadagiti plastic container a mabalin a pagmulaan.
(Naipablaak iti Hulio 30, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan laeng iti buqo.ph ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment