Di pay nakasagana ti Filipinas iti panagassawa ti lalaki ken lalaki, wenno ti babai ken babai.
Daytoy ti kuna ti Malakanyang iti sungbatna iti petision iti Korte Suprema tapno agbalin a legal ti panagassawa ti agpada ti katataoda (gender), a puon met ti debate iti pagilian a kaaduanna ti Katoliko.
Kas kuna ni Presidential Spokesman Harry Roque, adda rigrigatna nga aprobaran ti Korte Suprema daytoy.
Iti petision nga impila ni Atty. Jesus Falcis III iti Korte Suprema a nangidawat iti panagbalin a legal ti same-sex marriage, kuna daytoy nga iti 1987 Constitution, saan a nadakamat a ti kasar ket iti laeng nagbaetan ti lalaki ken babai, a kinuestionar a dagus ti sumagmamano a kameng ti Korte Suprema.
Segun kadagiti kritiko ti same-sex marriage, ti panggep ti kallaysa ket tapno maaddaan iti annak, idinto a dagiti ubbing nga inadaptar dagiti agkabbalay nga agpada ti katataoda (gender), manamnama ti panagsagabada ta dumakkelda iti aglawlaw a saan a normal.
Segun met iti Simbaan Katolika, ti relihion a pagkamengan ti nasurok a 80 a porsiento dagiti Filipino, kontra iti natural a linteg ti same-sex marriage.
Innayon ni Roque a sumagmamano kadagiti diputado a pakairamanan ni Dip. Geraldine Roman ti Bataan ti nangako a saan pay a tiempo ti same-sex marriage iti Filipinas.
Daytoy ti gapuna nga idurdur-as ita dagiti kameng ti LGBT (lesbian, gay, bisexual, transgender) ti SOGIE (Sexual Orientation and Gender Identity or Expression) bill gapu iti manamnama a saan a pannakaaprobar ti same-sex marriage. Panggep daytoy a gakat a salakniban ti asino man a tao iti ania man a diskriminasion.
(Naipablaak iti Hulio 23, 2018 a bilang.)
No comments:
Post a Comment