Arapaap ti gobierno nga inton madanon ti tawen 2022, addanton 300 a sientista a Filipino iti tunggal maysa a milion a Filipino. Iti ngamin 2013, addaan laeng ti Filipinas iti 187.7 a sientista iti kada maysa a milion a tao, maysa kadagiti kabassitan ti bilang a sientista iti Asia. Iti met kaudian a rekord ti Department of Science and Technology (DOST), manipud iti 9,877 a sientista a napan nagtrabaho iti ballasiw-taaw idi 1998, napanen a 24,502 iti 2009.
Gapu iti panagkurkurang dagiti sientista iti pagilian, nairusat met ti programa a “Balik-Siyentista” idi pay 1970s. Manipud met idi 1993, nangididiayan ti gobierno iti adu a benepisio kadagiti Filipino a sientista a nakasagana nga agawid ken agserbi iti pagilian iti tallo a tawen a pakairamanan ti research grant, plete iti eroplano a round-trip ken awanan bayadan a panangyawid kadagiti ramit.
Itay Hunio iti daytoy a tawen, pinirmaan met ni Presidente Rodrigo Duterte ti maysa a linteg a mangibilin iti DOST a mangilatang iti ad-adu pay a kantidad iti daytoy a Balik-Siyentista program— nupay di naikeddeng no mano— babaen ti panangnayon kadagiti benepisio kadagiti agawid a sientista a kas iti binulan nga alawans iti balay, seguro iti salun-at, ken tulong pinansial kadagiti annak dagiti sientista iti panagadalda kadagiti eskuela a kayatda.
Iti nagbaetan ti 2007 ken Abril 2018, mapan a 207 a sientista ti nangpadas iti Balik program, sumagmamano kadagitoy ti nagbayag iti sumagmamano a bulan ken addada met iti sumagmamano a tawen. Nakabusbos metten ti gobierno ti P173-milion iti panangiwayatna iti nasao a programa manipud idi 2007 agingga iti agtapos ti 2017.
Kuna ti gobierno a masapul nga agawid dagiti eksperto tapno masolbar dagiti parikut ti pagilain, a kas iti pannakaterred ti epekto ti panagbaliw ti panawen (climate change).
(Naipablaak iti Agosto 6, 2018 a bilang.)
No comments:
Post a Comment