Nangilatang ti Social Security System iti P7-bilion (P3.5-B ti naggapu iti gobierno nasional) tapno adda maipautang kadagiti kameng ti SSS a para iti panagbasa dagiti annakda.
Segun ken ni Social Security System (SSS) branch manager Rene Moises Gonzales a mabalin a makaala dagiti kualipikado a kameng ti Social Security System (SSS) iti educational assistance loan program (EALP) tapno adda mausar a para iti edukasion ti kaasitgan a kameng ti pamilia dagitoy.
Mabalin a benepisiario ti nasao nga utang dagiti kameng ti SSS ken ti legal nga asawa ken annakda. Para kadagiti di pay naasawaan a kameng, mabalinda a benepisiario ken dagiti kakabsatda.
Mapan a P20,000 ti kangatuan a mabalin a mautang iti kada semestre. Direkta a mapan iti eskuela a kas panangisigurado a maaramat ti kuarta a kas iti nakaisangratanna.
Maipanamnama iti kameng-immutang a maponduan ti benepisiario agingga iti agturpos daytoy manipud iti pannakaaprobar ti aplikasion iti EALP.
Nupay kasta, masapul a maipila ti loan (utang) iti tunggal semestre.
Kualipikado nga umutang dagiti kameng-umutang nga addaan iti di nababbaba ngem 36 a binulan a kontribusion, innem kadagitoy ti nabayadan iti saan a nabaybayag ngem iti napalabas a 12 a bulan sakbay ti panagipila iti aplikasion iti EALP.
Saan met a makautang dagiti nag-overdue ti kontribusionda.
(Naipablaak iti Hulio 23, 2018 a bilang.)
No comments:
Post a Comment