Rambaud, umawat iti Gawad Pambansang Alagad ni Balagtas

Maipaay ken ni Bannawag Editor Cles B. Rambaud itoy nga Abril 28 ti Gawad Pambansang Alagad ni Balagtas (Fiction in Ilokano) manipud iti Unyon ng mga Manunulat sa Pilipinas (UMPIL) “gapu kadagiti sinuratna a nangyanninaw kadagiti kabukbukodan a padas dagiti Ilokano a maitutop met iti unibersal a pagrukodan ti kinapudno ken hustisia ken iti agtultuloy a dedikasionna iti panangidur-as iti lengguahe nga Ilokano tapno magun-od daytoy ti pammigbig a kas lengguahe ti paglaingan ken pagsiriban.”

Immawat pay iti 2018 Pedro Bucaneg Award manipud iti GUMIL Filipinas, mabigbig ni Editor Rambaud, tubo iti Pinili, Ilocos Norte, a maysa kadagiti kangrunaan a mannurat a patanor ti Kailokuan. Piksionista, nobelista iti prosa ken komiks, mannaniw, mannalaysay, agipatpatarus ken editor, nakaawat iti premio dagiti sinuratna manipud kadagiti mabigbig nga institusion a kas iti Cultural Center of the Philippines (CCP), ken iti National Commission for Culture and the Arts (NCCA). Kas mangitantandudo iti lengguahe, isu ti kangrunaan a nangisagana iti borador (draft) ti “Ortograpia ti Pagsasao nga Ilokano” (2012).

Mayawat ti nasao a pammadayaw bayat ti 44th National Writers’ Congress ken 31st Gawad Pambansang Alagad ni Balagtas iti daytoy Abril 28, 2018 iti Gerry Roxas Foundation Training Resource Center, Dayao, Roxas City, Capiz, West Visayas.

Dagiti nasao a pasken ti mangserra iti National Literature Month iti daytoy a tawen nga indauluan ti National Commission for Culture and the Arts (NCCA), Komisyon sa Wikang Filipino (KWF), ken National Book Development Board (NBDB).

Babaen ti tema a “Kadulom kag Kasanag: Panitikan ng Pag-asa,” maiwayat ti dua a forum iti kongreso, ti “Ang Karimlan sa Panitikan” ken “Ang Liwanag sa Panitikan.”

Kakadua ni Rambaud a mapadayawan da Abdon Balde, Jr. (Fiction in Filipino); Ariel Dim. Borlongan (Poetry in Filipino); Alain Russ Dimzon (Poetry in Hiligaynon); Reynaldo Ileto (Criticism in English); Malou Jacob (Drama in Filipino); Connie Jan Maraan (Fiction in English); ken Myrna Peña-Reyes (Poetry in English).

Mayawat met ti Gawad Paz Marquez Benitez ken ni Susan Evangelista idinto a maipaayan iti Gawad Pedro Bucaneg ti Women in Literary Arts (WILA) ti Cebu.

Ti Kongreso ken Pammadayaw ket sinuportaran ti Provincial Government of Capiz, Gerry Roxas Foundation, Linangan sa Imahen, Retorika, at Anyo (LIRA), Filipino Chinese Chamber of Commerce, ken Soong Ching Ling Foundation.    


(Naipablaak iti Bannawag iti Abril 30, 2018 a bilang.)