Inyalat ni Remedios S. Tabelisma-Aguillon ti Umuna a Gunggona iti Salip iti Sarita ti kalleppas a 20th AMMA Foundation Literary Awards.
Naipasngay ni Tabelisma iti Diaz, Umingan, Pangasinan; dimmakkel iti Almaguer South, Bambang, Nueva Vizcaya; ngem nagbalasang, ken nagkolehio iti Mindanao. Binangonda iti daydi kapisi-ti-pusona Crispulo B. Aguillon ti pamiliada iti Brgy. Topland, Koronadal City, South Cotabato. Agnanaed ita iti Cagayan de Oro City iti sidong ti maysa kadagiti lima nga annakna.
Pinangabak ‘toy retirado a prinsipal iti San Miguel National High School iti Norala, South Cotabato ti saritana a “Ni Boyet.”
Dagiti kakadua ni Aguillon a nangabak:
Maikadua a Gunggona, Quezon E. Javier, babaen ti saritana nga “Atang.” Tubo iti Baresbes, Dingras, Ilocos Norte, ken agdama nga Agriculturist 1 iti Dept. of Agriculture-Regional Field Office 1, San Fernando City, La Union.
Maikatlo a Gunggona, Dexter M. Fabito, tubo iti Balingit, Pamplona, Cagayan, nagturpos iti BS in Information Technology iti Cagayan State University-Sanchez Mira Campus, babaen ti saritana nga “Anibersario.”
Mapadayawan dagiti nangabak bayat ti Dap-ayan 2018 ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, a maangay inton Abril 20-22 iti Moonlite Paradise Resort, Brgy. Diora-Zinungan, Santa Ana, Cagayan, kas impakaammo dagiti mangimaton iti AMMAFLA a da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii).
Naggibus ti salip iti sarita ti maika-20 nga edision ti AMMAFLA idi Enero 15, 2018. Tinawen nga ang-angayen ti AMMAFLA ti salip iti sarita iti pannakitinnulong ti Bannawag.
Dagiti naghurado: Aileen R. Rambaud, pangulo; Ariel S. Tabag, kameng; ken Juan Al. Asuncion, kameng.
Dagiti gunggona: Umuna, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw.
(Naipablaak iti Bannawag, Abril 23, 2018 a bilang.)
No comments:
Post a Comment