Maragsakan ti Department of Tourism (DOT) iti panangibilang ti Forbes.com iti Filipinas a kas maysa kadagiti kangrunaan a pagpasiaran iti Asia itoy a tawen.
Babaen ti artikulo a napauluan iti “The 5 Spots In Asia That Are Booming With Tourists In 2018,” nadakamat a ti immadu a turista ket gapu iti napasayaat a panagbiahe ken impraestruktura iti Filipinas.
Inraman ti Forbes.com ti Filipinas kadagiti kangrunaan a destinasion iti Asia a kakadua ti Japan, Malaysia, Indonesia, ken South Korea.
Segun ken ni Tourism Secretary Wanda Tulfo-Teo, ti pannakairaman iti listaan dagiti maipangruna a pagpasiaran ket testamento iti kinaanduar dagiti Filipino ken iti kinapinget dagitoy a mangitandudo iti pagilian a kas natalged ken naragsak a pagpasiaran.
Nadakamat iti nasao nga artikulo a gapu kadagiti pannakapasayaat dagiti lokal nga impraestruktura, addaanen dagiti kangrunaan a pagpasiaran iti pagilian kadagiti domestic airport nga addaan met iti regular a biahe a mapan ken aggapu kadagiti kangrunaan a siudad iti pagilian.
Itay napan a tawen, napapintas ti sumagmamano nga internasional nga eropuerto ken plano a mapapintas pay dagiti sabsabali nga internasional nga eropuerto a kas iti Iloilo International Airport, Bacolod-Silay Airport, Laguindingan Airport iti Misamis Oriental, ken New Bohol International Airport iti Panglao.
Segun iti kaudian nga estadistika iti turismo, nakapasangpet ti pagilian iti 1,406,337 nga internasional a bisita iti Enero ken Pebrero itoy a tawen, mapan a 16.15 porsiento ti ngatngatuanna ngem iti 1,210,817 iti isu met laeng a tiempo idi 2017.
(Naipablaak iti Bannawag iti Abril 16, 2018 a bilang.)
No comments:
Post a Comment