Tapno maliklikan ti pannakailumlom iti utang dagiti mannursuro kadagiti pribado nga agpapautang ken mabayadan dagitoy ti binulan a premiumda iti GSIS, nagtulag ti Government Service Insurance System (GSIS) ken ti Department of Education (DepEd) a yimplementarda ti GSIS financial assistance loan program wenno GFAL.
Sinaksian a mismo ni Presidente Rodrigo Duterte ti pannakapirma ti memorandum of agreement iti nagbaetan ti Government Service Insurance System (GSIS) ken ti Department of Education (DepEd).
Nagpirma para iti DepEd ni Education Secretary Leonor Briones idinto a ni GSIS President ken General Manager Jesus Clint Aranas ti nangibagi iti GSIS iti nasao a pasken iti Malakanyang.
Mayayon ti pannakayimplementar ti GFAL iti kalikagum ti administrasion ni Presidente Duterte a tumulong a mangpasayaat iti kasasaad dagiti mannursuro ken dadduma pay nga empleado ti DepEd.
Panggep ti katulagan a pautangan ti GSIS dagiti titser iti pagbayadda iti utangda kadagiti pribado nga agpapautang nga akreditado iti DepEd ket bayadan dagiti titser ti nasao nga utangda iti GSIS iti nababbaba nga interes.
Babaen met itoy, matulongan dagiti titser a mangbayad iti binulan a premium ken kontribusionda iti GSIS a saan ket a maibaybayad lattan ti kuartada kadagiti utangda kadagiti pribado nga agpapautang.
Babaen pay ti nasao a programa ti DepEd ken GSIS, maangay ti financial literacy seminar a para kadagiti mannursuro tapno masuruanda a mangimanehar iti maig-iggamanda a kuarta.
Iti kaadu dagiti utang a baybayadan dagiti mannursuro, kuna ti DepEd a maksayan met ti kapabilidadda a mangbayad kadagiti obligasionda a pakairamanan ti binulan a kontribusion ken premiumda iti GSIS, banag a mangapektarto kadagiti benepisio nga awatenda iti gobierno. Ngarud, nasken laeng a matulongan dagiti mannursuro ken dadduma pay nga empleado ti DepEd tapno mabayadandan dagiti utangda kadagiti pribado nga agpapautang.
(Naipablaak iti Bannawag iti Abril 30, 2018 a bilang.)
No comments:
Post a Comment