Maiwayat ti Umuna a North Luzon Film Festival inton Marso 24-26, 2017 iti Brickstone Cinema, Tuguegarao City, Cagayan babaen ti panangilungalong ti North Luzon Cinema Guild, Inc.
Manamnama a dar-ayan dagiti filmmaker manipud kadagiti rehion ti Cagayan Valley, Cordillera Administrative Region, Ilocos ken Central Luzon.
Addaan ti festival iti tema a “Cinema Padday: Sikami nga Taga Norte” a kas pangitan-ok iti kultura, literatura ken kannawidan dagiti taga-Amianan nangruna kadagiti umili ti probinsia a Cagayan. Balikas nga Ybanag ti “padday” a kaibatogan ti “parnuay” dagiti Ilokano.
Babaen ti pannakibinnulig iti National Commission on Culture and the Arts (NCCA), panggep ti festival a rubroban ti adbokasia ti panangsaluad kadagiti rehional a pelikula tapno agrimat pay ti literatura, arte ken kultura dagiti taga-Amianan. Iti biang dagiti organizer nga idauluan ni Jerome Dulin, founding director ti North Luzon Cinema Guild, Inc., mamati a dakkel ti maipaay daytoy nga inspirasion kadagiti agdadamo a filmmaker.
Karaman pay kadagiti makibinnulig iti daytoy a festival ti Department of Tourism Region 2, Philippine Information Agency Region 2, opisina ni Diputado Randy Ting ti 3rd District ti Cagayan, ken dagiti nadumaduma a media partner a kas iti CinemaBravo ken Viddsee.com.
Silulukat iti publiko ti festival nga addaan iti tallo a paset: Culture, Regional Film Literacy and Tourism Conference; Regional Film Exhibition; ken, North Luzon Film Festival – Cinema Padday (Shortfilm Competition).
Para iti naan-anay nga impormasion maipapan iti festival, kontaken ti Secretariat ti North Luzon Cinema Guild Inc. iti 0927 383 1212, 0926 909 1889 ken 0947 348 6153 wenno ag-e-mail iti cinemapadday@gmail.com / cinemaguildluzon@gmail.com. Mabalin pay a bisitaen ti event page ti festival iti Facebook. (Jan Justin C. Rodriguez)
(Naipablaak iti Bannawag, Marso 20, 2017 a bilang.)
No comments:
Post a Comment