Sangapulo ket maysa a sarita ti naawat ti Secretariat ti Mario Abinsay Albalos Foundation Literary Awards a para iti inwayat daytoy a Salip iti Sarita.
Narugian ti salip idi Oktubre 1, 2016 ken naggibus itay Marso 3, 2017.
Dagiti sarita ken parbo a nagan dagiti autor:
“Agsublikan, Baket” ni X, “Dagiti Maris ti Bullalayaw” ni Amalio Sereno, “Kas iti Panagburak ti Dalluyon” ni Jajejijoju, “Darasudos” ni Darah Sue Doss, “Hawaii Ditoyen, Mikiong!” ni Lucio Zathaniku Jr.;
“Fina” ni Mayyang, “Kadkad” ni Kael, “Baro a Puli” ni King Koi, “Kristo” ni Diosdado Villa, “Pasintawi ti Bibilan ken Dadapilan” ni An-anabo T. Padsan, ken ti “Ti Aktibista” ni Renato Vencer.
Nabangon ti Mario Abinsay Albalos Foundation Literary Awards tapno tumulong iti ad-adda pay a pannakapasantak ti Literatura Ilokana. Naipanagan daytoy iti daydi Dios-ti-aluadna a mannurat ti Bannawag Mario A. Albalos, tubo iti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee iti Estado ti Hawaii a nagnanaedanna agingga iti pimmusay idi Marso 3, 1991 iti edadna a 40.
Agpaay a mangimaton iti pasalip ti foundation dagiti gagayyem daydi MAA a da Jenny Alcausin (agnanaed iti California), Amado I. Yoro, Jun Abinsay, ken Priscilla Dela Cruz (agpapada nga agnanaed iti Hawaii) ken iti pannakitinnulong dagiti kameng ti Bannawag.
Dagiti gunggona: Umuna, P15,000.00; Maikadua, P12,00.00; ken Maikatlo, P10,000.00.
Mapadayawan dagiti mangabak bayat ti Dap-ayan 2017 ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, inton Abril 21-23, 2017 iti Union Christian College, City of San Fernando, La Union.
(Naipablaak iti Bannawag, Marso 20, 2017 a bilang.)
No comments:
Post a Comment