Miting ti GUMIL Cagayan, Abril 2

Angayen ti GUMIL Cagayan, iti panangidaulo ni Freddie P. Masuli, ti miting ti gunglo inton Abril 2, 2017, ala 1:30 iti malem, iti Golden Harvest Subdivision, Carig, Tuguegarao City, iti panangsangaili da Board Member Vilmer Viloria ken ti pamiliana.

Mapagpapatanganto iti nasao a miting ti plano ti organisasion iti partisipasionna iti masungad a Nasional a Kombension ti GUMIL Filipinas a maangay sadiay San Fernando City, La Union, kangrunaanna ti pannakapili ti mangibagi iti GUMIL Cagayan iti pannakapili ti Miss GUMIL Filipinas.

Maaramid pay ti reorganisasion ti grupo a kas panangtungpal iti napabaro a paglintegan ti GUMIL Filipinas mainaig iti pannakapili dagiti baro nga opisial ti tunggal GUMIL Provincial Chapter a maigiddan ti eleksion dagiti sanga ti GUMIL iti eleksion ti liderato ti GUMIL Filipinas.

Manamnama ti itatabuno dagiti regular a miembro ken dagiti agngayangay nga agbalin a miembro. Para iti ad-adu pay nga impormasion, mabalin a kontaken dagiti sumaganad: Freddie P. Masuli (0995- 884-3797), Vilmer Viloria (0920-9038-511) ken Arthur Urata (0926-5154-744). (FPM)


(Naipablaak iti Bannawag, Abril 3, 2017 a bilang.)