Inyalnag ti 77th Infantry Battalion ti Philippine Army a nakabase iti Camp Melchor de la Cruz, Upi, Gamu, Isabela itay nabiit ti maysa a proyekto tapno maital-o ti propesional a saguday ken kabaelan dagiti kameng ti Civilian Armed Forces Geographical Unit wenno CAFGU iti tay-ak ti panggedan
Maysa nga irregular a kameng ti Armed Forces of the Philippines dagiti CAFGU a nabukel babaen ti bileg ti Orden Ehekutibo Blg. 264 a pinirmaan ni sigud a Presidente Corazon C. Aquino idi 1987 tapno tumulong a mangtaginayon iti kappia kadagiti lugar a nagtaltalinaedan dagiti rebelde.
Naawagan ti proyekto iti Resource Management Through Alternative Learning, panggep daytoy a padur-asen ti kabaelan dagiti CAFGU babaen ti panagadalda iti Alternative Learning System ken Open High School Program.
Nabuangay pay ti maysa nga school-on-the-air a pakasanayan dagiti kameng ti tropa kadagiti nagduduma a tay-ak ti pagsiriban babaen ti radio.
Babaen ti tulong ti Technical Education and Skills Development Authority (TESDA), maisayangkat pay dagiti panagsanay a mainaig iti bokasional a kabaelan.
Kuna ni Col. Jos Arn M. Real, Commanding Officer daytoy a batalIon a mangsakup iti sibubukel a Tanap ti Cagayan ken Cordillera, nga intuyang ti Orden Ehekutibo Blng. 264 a mabalin a sumrek ti asino man nga umili iti CAFGU no la ketdi nasalun-at ken kabaelanna ti makipaset iti pannakasalaknib ti ili.
Iti nabiit pay a panagsukisok nga insayangkat ti batalion, agparparang a walo iti tunggal sangapulo a CAFGU ti saan a nakalpas iti hayskul wenno nagsardengda a nagadal idi addada pay laeng ti elementaria wenno hayskul. Iti pannakipartisiparda iti proyekto, maikkanda iti gundaway a makalpas iti hayskul babaen ti Accreditation ken Evaluation nga isayangkat ti Departramento ti Edukasion.
Umuna ken kakaisuna iti sibubukel a Philippine Army daytoy a klase ti proyekto, manamnama a mapardur-asna ti propesionalismo ken magapuanan ti armada. (Rony Hopeman S. De Leon)
(Naipablaak iti Bannawag, Marso 20, 2017 a bilang.)
No comments:
Post a Comment