Eleksion ti SK ken barangay, mabalin a maisanud

Mabalin a maisanud ti pannakaangay ti eleksion ti barangay ken Sangguniang Kabataan manipud iti Oktubre 31, 2016 iti Oktubre 23, 2017 ken mapalubosan met dagiti punong barangay ken kagawad nga agserbi agingga iti awan mabotosan a sukatda.

Sakbayna, inaprobaran ti House committee on Suffrage and Electoral Reforms ti gakat (House Bill 3384) a mangpaisanud kadagiti nasao nga eleksion ket manamnama nga aprobaran daytoy ti Kamara agingga iti maikatlo ken maudi a pannakaibasana bayat met a maur-uray ti bersion ti Senado para iti nasao a panggep.

Kinuna ni Citizens Battle Against Corruption (CIBAC) Rep. Sherwin Tugna, chair ti komite, a no la ketdi agpada ti bersion ti Kamara ken Senado, awanton ti bicameral meeting ket mapagbalinton a linteg ti pormal a pannakaituding ti baro a petsa dagiti nadakamat nga eleksion.

Sagudayen ti HB 3384 nga indatag kangrunaanna ni House Speaker Pantaleon Alvarez, ti sumaruno a maangay nga eleksion ti barangay ken SK kalpasan ti 2017 ket inton 2020 ken saanto a makigiddan iti midterm election a maangay inton Mayo 2019, kas sagudayen ti Konstitusion iti 1987.


(Naipablaka iti Bannawag, Septiembre 19, 2016 a bilang.)