Maisagsaganan ti antolohia dagiti ababa a sarita nga Ilokano dagiti babbai a mannurat babaen ti Tagnawa Series ti GUMIL Filipinas ken pagpaayan nga editor da Linda T. Lingbaoan-Bulong, Sherma E. Benosa ken Rhea Rose D. Berroy. Manamnama a mairuar inton 2017, daytoy ti kaunaan a libro a pakatiponan dagiti sarita dagiti babbai a mannurat. Daytoy met ti maikapat a libro iti serye ti proyekto a panagipablaak ti GF nga iwarwardas ti Editorial Committee ti gunglo.
Pagalagadan ti panagidatag:
1. Dua a sarita ti idatag. Nasaysayaat no di pay naipablaak ti idatag ngem mabalin met no naipablaaken iti magasin, wenno dadduma pay a babasaen wenno iti Internet. No naipablaaken, masapul nga adda notasion iti baba ti sinurat mainaig iti detalye ti pannakaipablaak daytoy. Maysa laeng ketdi a sarita ti mairaman iti antolohia, ken segun iti pangngeddeng dagiti editor. Karbengan dagiti editor ti di mangiraman kadagiti maidatag a sarita a di makapatar iti pagrukodanda.
2. Uray ania a sarita ti idatag, nawaya ti tema a suraten, ken iti tradisional man wenno eksperimental a wagas. Nupay kasta, maikkan iti importansia dagiti sarita a mangtaming iti pakaseknan dagiti babbai, gender issues a kas iti gender equality ken gender sensitivity, kdp.
3. Mapakuyogan dagiti sarita iti pakasaritaan ti biag ti autor, agraman ti contact information (adres, numero ti telepono/selpon, e-mail). Pakuyogan ti manurat ti sinuratna iti kaudian a retratona iti .jpeg a file format.
4. Ipatulod babaen ti e-mail dagiti sarita iti matronatres@yahoo.com, sherma.benosa@gmail.com, wenno rhearoseberroy@gmail.com. Mabalin pay nga ited babaen ti private message iti Facebook account dagiti editor.
5. Masapul a maawat dagiti sarita iti di naladladaw ngem iti Oktubre 31, 2016.
6. Mapakaammuan dagiti autor a mairaman iti libro makabulan kalpasan ti naituding a deadline.
7. Para iti dadduma pay a detalye, makiuman kadagiti editor babaen dagiti e-mail address iti ngato.
(Naipablaak iti Bannawag, Septiembre 26, 2016 a bilang.)
No comments:
Post a Comment