April 5, 2016

Umad-adu a Filipino ti mangayat nga agtrabaho iti bukodda a pagilian

Maysa a nabiit pay a naisayangkat a panagadal ti agkuna nga umad-adu a Filipino ti kaykayatna pay laeng ti agtrabaho iti bukodna a lugar ngem ti mapan iti ballasiw-taaw.

Insayangkat ti Department of Labor and Emloyment (DOLE) ti nasao a panagadal iti pannakitinnulong ti job search website, JobStreet.com. Iti nasao a panagadal, tallo iti uppat kadagiti 31,000 a napagsaludsodan iti sapasap a pagilian ti nagkuna a kaykayatda ti agtrabaho iti bukodda a lugar ngem ti mapan pay laeng agtrabaho iti sabali a lugar.

Mairaman kadagiti rason no apay a kaykayatda ti agtrabaho iti bukodda a lugar ti kaadda sadiay ti pamilia ken gagayyemda, ti aglawlaw nga ayan ti trabahoda, ti saanda a pannakaikawa iti kultura, ken ti balansiado nga oras a kaadda iti trabaho ken ti kaaddada iti sidong ti pamiliada.

Kinuna ni JobStreet.com Philippines Country Manager Philip Gioca a daytoy a kapanunotan, ad-adda ketdi a makita kadagiti nataenganen a mangmangged.

“Dagiti nataengan, nakaadal ken namsek iti padas ti ad-adda a mangpili iti bukodda a lugar a pagtrabahuan,” kinuna ni Gioca.

Agtawen met manipud 15 agingga iti 55 dagiti napagsaludsodan ken graduadoda iti high school no di man addaanda payen iti masteral ken doctoral degrees.

Iti sabali a bangir, ti nabati met a 25 porsiento dagiti napagsaludsodan, kunada a kaykayatda ti rummuar gapu iti kinababa ti sueldoda iti agdama a pagtrabahuanda.

Kinuna ni Labor and Employment Secretary Rosalinda Baldoz a ti kaudian a surbey, ipakitana laeng nga addan simmayaatan ti kasasaad ti pagtrabahuan iti pagilian.

“Mayayon daytoy iti panggep ti gobierno a mangipaay iti pagtrabahuan kadagiti mangmanggedtayo ta akuentayo man wenno saan, dakkel ti epektona iti gimong ken pamilia ti ipapanaw dagiti kakailiantayo tapno manggedda iti ballasiw-taaw,” innayon ni Baldoz.


(Naipablaak iti Bannawag, Abril 11, 2016 a bilang.)

No comments:

Post a Comment