Nesperos, Umuna iti 2nd Saniata Prize

Nesperos

Inyalat ni Daniel L. Nesperos ti San Nicolas, Ilocos Norte, ti Umuna a Gunggona iti Salip iti Daniw ti 2nd Saniata Prize babaen ti daniwna nga “Aguy-uyekka Manen, Piman.” Maipaayan ni Nesperos iti PhP2,000 a premio a kuarta ken tallo a libro nga Ilokano ken medalia ken sertipiko.

Ni met Ria Rebolledo ti Baguio City ti nakagun-od iti Maikadua a Gunggona babaen ti daniwna a “Ti Kompositor Dagiti Kansion ti Tudo.” Maipaayan ni Rebolledo iti PhP1,200 a premio a kuarta ken dua a libro nga Ilokano ken sertipiko.

Inyalat met ni Delfin P. Dumayas ti San Nicolas, Ilocos Norte ti Maikatlo a Gunggona babaen ti daniwna a “Limdo.” Maipaayan met iti PhP1,000 a premio a kuarta, maysa a libro nga Ilokano, ken sertipiko.

Mayawat dagiti premio bayat ti Dap-ayan 2016, ti kombension dagiti mannurat nga Ilokano, inton Abril 22-24, 2016 idiay Apayao Agri Eco-Tourism & Sports Complex, Payanan, San Gregorio, Luna, Apayao.

Ti Saniata Prize ket tinawen a Salip iti Daniw nga esponsoran ti Saniata Publications nga imatonan ni Norielyn Cullar-Tabag ken ti pamiliana.

Nagpaay a hurado da Cles B. Rambaud, Roy Vadil Aragon ken Ariel S. Tabag.


(Naipablaak iti Bannawag, Abril 25, 2016 a bilang.)