Bulan ti Literatura ti Filipinas, marambakan iti daytoy nga Abril

Rambakan ti pagilian ti Bulan ti Literatura ti Filipinas (Buwan ng Panitikan ng Filipinas wenno National Literature Month) iti daytoy nga Abril.

Dagiti mangidaulo iti parambak: National Commission for Culture and the Arts (NCCA) nga idauluan da chairman Felipe M. de Leon Jr. ken OIC-executive director Adelina M. Suemith; ti Komisyon sa Wikang Filipino (KWF) nga idauluan ni National Artist Virgilio Almario a chairman; ken ti National Book Development Board, nga idauluan ni Chairperson Flor Marie Sta. Romana Cruz.

Nadumaduma a pasken mainaig iti literatura ken kultura ti maiwayat iti las-ud ti bulan ti Abril “tapno matignay ti panunot ken mapabaknang ti kararua.”

Mangrugi ti National Literature Month iti pannakarambak ti Francisco “Balagtas” Baltazar Day wenno Araw ni Francisco “Balagtas” Baltazar itoy nga Abril 2 babaen ti aggiddan a pannakairuknoy dagiti sabsabong kadagiti batonlagip ni Balagtas iti Pandacan (Manila), Balagtas (Bulacan), ken Orion (Bataan).

Maiwayat kalpasanna dagiti nadumaduma nga aktibidad a mainaig iti literatura a kas kadagiti komperensia, workshop, ken dadduma pay iti nadumaduma a paset ti pagilian a kas iti Metro Manila, Camarines Sur, Baguio City (Benguet), Pampanga, Laguna, Dapitan City (Zamboanga del Norte), Cebu City, Bacolod City (Negros Occidental).

Kamaudiananna, iwayat ti Unyon ng mga Manunulat sa Pilipinas (UMPIL) ti UMPIL Pambansang Kongreso ng mga Manunulat iti Ateneo de Manila University inton Abril 30.

Naideklarar ti Abril a kas Buwan ng Panitikang Filipino wenno National Literature Month babaen ti Proclamation No. 968 a pinirmaan ni Presidente Aquino idi Pebrero 10, 2015.

Naiwayat ti umuna a pannakarambak ti National Literature Month itay napan a tawen ket iti daytoy a tawen, impanamnama ti NCCA ken KWF ti narungrungbo a pannakarambak tapno maipaganetget ti napateg nga akem ti literatura iti kabibiag ken iti kinaasino ni Filipino.

Iti biang ti GUMIL Filipinas, rambakanna met ti Bulan ti Literatura Ilokana inton Abril 22-24 iti probinsia ti Apayao, kas pannakipasetna iti Bulan ti Literatura ti Filipinas.

(Naipablaak iti Bannawag, Abril 4, 2016 a bilang.)