Dr. Dedicacion Agatep-Reyes, 92

Pimmusay ni Dr. Dedicacion Agatep-Reyes itay Oktubre 25, 2015. Rambakanna koma ti maika-92 a kasangayna inton Nobiembre 9. Kaingungot daydi Dr. Godofredo Reyes, na-gobernador ken nagdiputado iti Ilocos Sur, mabigbig met laeng a mangngagas ni Doktora Cion, awag dagiti kasingedna kenkuana a kas ken ni GSR.

Nalatak nga edukador, isu ti umuna a presidente ti University of Northern Philippines (1972-78), nagbise-mayor iti ilina a Sta Maria, I.S., nagbise-gobernador iti Ilocos Sur, ken nagpaay a Chairman ken Presidente ti St. Mary's College a pinundar daydi Doktor Reyes, agingga iti ipupusayna.

Malaglagipto ni Doktora Reyes a kas kangrunaan a timmulong ken ni GSR iti pannakatagibi ti GUMIL Filipinas iti 14 a tawen a panagpaay daydi GSR a presidente ti GF.

Dagiti agassawa ti nangsangsangaili kadagiti mannurat nga Ilokano iti tinawen a pannakaangay ti kombension ti GF iti uneg ti panagtakem ni Dr. Reyes a kas presidente.

Maysa kadagiti maipagpannakkel a patanor ti Sta. Maria, malaglagipto pay ni Doktora Reyes a kinatinnulong daydi Dr. Reyes a nangimanton iti uppat a sanga ti Clinica Reyes iti ilida ken iti Pangasinan ken iti Nueva Ecija.

Mabigbig pay ni Doktora Reyes gapu iti adu a pammadayaw a naipaay kenkuana manipud iti panagturpos a kas Summa Cum Laude iti Edukasion ken Magna Cum Laude iti Medisina iti UST, ken kas topnotcher iti Medical Board idi 1953. (Eliseo B. Contillo)

(Naipablaak iti Bannawag, Nobiembre 9, 2015 a bilang.)