August 14, 2012

Ti Makunami -- Agosto 20, 2012


Ti K to 12 Basic Education Curriculum

Iti daytoy a panaglukat dagiti klase, nairugin ti pannakayimplementar ti K to 12 Basic Education Curriculum iti Umuna a Tukad a pakausaran iti nakayanakan a pagsasao iti panangisuro kadagiti ubbing a Grade One. Kadakami nga adda iti Departamento ti Edukasion, ita a mariknami unay ti kinapateg ti pagsasao iti bukod nga ili wenno probinsia. Kas koma iti Ilocos Norte, Ilokano ti pagsasaomi. Ngem iti laksid daytoy, adu pay laeng dagiti agtirtiritir ti dilana nga agsao iti Ilokano. Mabalin a ti gapuna, saanda nga us-usaren daytoy iti uneg ti pagtaenganda wenno awan ti mariknada a pateg ti nasao a pagsasao.

Iti sabali a bangir, kablaawanmi met dagiti mangisursuro a sisasagana a nangawat iti dakkel a karit ti baro a kurikulum. Iti uneg ti pagadalan, dagiti ramit wenno materiales nga us-usarenda iti Umuna a Tukad, Ilokano metten ti pannakaisuratda. No agipalawag ti maestra, pudno a maawatan dagiti ubbingna, ken maay-ayo met dagitoy nga agsungbat kadagiti saludsod ti maestrada.

Sapay koma ta dagiti nagannak ken amin a maseknan, in-inut a maawantada ti adu a tulong a maited ti K to 12 Basic Education Curriculum kadagiti ubbing nga agad-adal.
--Rosario R. Lamug
   DepEd, Division of Ilocos Norte

*     *     *

National Greening Program

Mainaig daytoy iti sinurat ni Apo Ana Liza G. Sibbaluca maipanggep iti National Greening Program (“Maysa a Bilion a Kayo?”, Hulio 16, 2012.)

Ti saludsod: apay nga awan met ti adu unay a tumaud a kayo iti laksid ti kaadutayo nga agmulmula iti kayo?

Idi addakami iti elementaria idi katengngaan ti 70s, mapadasanmi ti nakipagmula iti kayo iti maysa a paset ti kabambantayan ti ilimi a Batac, Ilocos Norte. Naulit-ulit dayta agingga iti panagkolehiomi. Kumunolkunolkami idi iti kaadumi a mapan ag-reforestration. Mapampanunotmi ngarud nga awan koma itan ti lusotan a magna iti kaadu ti kayo.

Mangisursurokamin iti eskuela publika idi dakami met laeng ti nakasungbat iti dayta a saludsodmi. Pagmulmulaenmi met ngamin iti kayo dagiti pupils-mi. Nasayaat unay ti pannakataripato dagiti mulami a patubo ta bigat ken malem a pasibuganmi ida. Inaladanmi pay ida ken agusarkami pay iti abuno ken pestisidio. Ngem kaskasdi nga adda latta matay; adda latta natungil a dumakkel.

Maidasigmi ngarud dagiti pamulami iti eskuela kadagidi napanmi immulmula iti bantay a dimin maitudo no sadino. Nagbiagda ngata ket narigat pay nga agbiag dagitoy madungdungngo a mulami iti eskuela?

Adda met immulami a gmelina iti matapuakan ti danum no aglipias ti tangke ti eskuela no agpaulikami iti danum. Dakkelen a pinuon. Mapampanunotmi ngarud a no kasdiay koma ti pannakasibsibog dagidi mulami sadiay bantay, sigurado a naisubli koma itan dagidi nagpukaw a kabakiran.

Gumasut met ngatan ti napadakkelmi a kayo ditoy pangisursuruanmi a Quiling Elementary School. Ngem adda latta met mabual no kasta nga agbagyo. Kapilitan met latta nga adda mapukan no agkasapulan ti eskuela iti kayo.

Maigapu kadagitoy a padasmi, patienmi nga agballigi laeng ti National Greening Program no dagita a maysa a bilion a maimula a kayo ket mataripato, maited dagiti kasapulanda a kas mula, masalaknibanda kadagiti siba, saanda a mabagyo ken saanda a mauram. Kangrunaanna, no saanda a masigud a mapukan.
--EFREN A. INOCENCIO
   Siudad ti Batac

No comments:

Post a Comment