July 29, 2011

Panangala iti pension, napartaken para kadagiti nagretiro iti gobierno

Saanen a marigatan dagiti retirado nga empleado ti gobierno iti panangalada kadagiti benepisio iti panagretiroda kalpasan a pinirmaan ni Presidente Aquino ti linteg a mainaig itoy.

Segun ken ni Sen. Antonio Trillanes IV, dakkel a banag daytoy Republic Act No. 10154 ta masingir dagiti retirado nga empleado dagiti benepisioda iti uneg laeng ti 30 nga aldaw wenno makabulan kalpasan ti panagretiroda.

Kinuna ni Trillanes a gapu iti napartak a panangpirma ti Presidente itoy, maamiris panangbigbig ti Presidente kadagiti sakripisio dagiti opisial ken empleado a nangipaay iti dinekdekada a napudno a panagserbi iti publiko, a masansan a nagan-anus ken nangyan-anay kadagiti sueldo ken benepisio nga agarup agkurang pay para iti kasapulan ti pamiliada.

Sagudayen ti baro a linteg, ti employer-agency, ti GSIS, Home Development Mutual Fund (HDMF) ken Department of Budget and Management (DBM), ti natudingan a mangisigurado a maala ti nagretiro nga empleado ti gobierno ti amin a benepisio iti naituding a panawen.

(Naipablaak iti Bannawag, Agosto 8, 2011 a bilang.)

No comments:

Post a Comment