Lalo a mapairut ti sinninged ti Filipinas ken Taiwan iti katulagan ti dua a pagilian nga agtinnulong tapno maaddaan iti National Green Transport System ti Filipinas.
Segun ken ni Senador Edgardo Angara, masapul ti suporta ti Taiwan tapno makabukel ti Filipinas iti baro a kita ti electric vehicle a makatulong tapno makissayan ti mausar a krudo iti pagilian, a maysa kadagiti kangrunaan a mangparparigat iti ekonomia.
Iti 17th Philippine-Taiwan Joint Economic Conference, indatag ti Taipei Economic and Cultural Office (TECO) ken ti Manila Economic and Cultural Office (MECO) ti Letter of Intent para iti Electric Vehicle Development.
Nagtulag ti TECO ken MECO a maaddaanda iti naiget a panagsukisok iti electric vehicle iti pagilian, babaen ti tulong ti Industrial Technology Research Institute ti Taiwan.
Kuna ni Sen. Angara a daytoy a tulag ket addang iti umno a direksion gapu ta agbalbalinen ti Tawian a lider iti electric vehicle iti sangalubongan. Addan daytoy iti wadan a pangibasaran ti Filipinas iti pagalagadanna ken iti estratehia iti panagnegosio para iti panagdur-as daytoy Green Transport System.
Kuna pay ti senador a makatulong ti panagusar iti electric vehicle iti pannakakissay ti polusion, iti di panagdepende ti pagilian iti krudo, malaksid pay iti pannakapapartak ti transportasion.
Innayon pay ni Angara nga adu dagiti lokal a gobierno ti interesado iti electric vehicle, maysa a pagilasinan nga agballigi ti proyekto ta manamnama nga adu ti mangusar iti daytoy.
Kuna pay ni Angara a parparmataenna ti Green Transport System a mangiraman iti pannakausar dagiti paggapuan ti renewable energy a kas iti geothermal, solar, wind wenno biofuel a mangpataray kadagiti dekoriente a lugan a para pasahero a kas iti dyipni, traysikel ken haybrid a lugan.
(Naipablaak iti Bannawag, Agosto 1, 2011 a bilang.)
No comments:
Post a Comment