July 29, 2011

Padanum, usarenyo koma kuna ni Sek. Alcala kadagiti mannalon iti Ilocos Sur

Kiniddaw ni Sek. Proceso Alcala ti Departamento ti Agrikultura kadagiti mannalon iti Umuna a Distrito ti Ilocos Sur a benepisiario ti nabiit pay a naluktan a Banaoang Pump Irrigation System nga usarenda koma a nasayaat ti irigasion tapno dumakkel ti apit iti tunggal ektaria nga iti agdama, pakaap-apitan iti 4.25 a tonelada ti tunggal ektaria.

“Kasapulan nga awisentayo pay dagiti saan a mangayat a mangusar iti daytoy a padanum tapno mapadanuman ti 5,332 nga ektaria a nakaisangratan ti BPIS. Ita umabot laeng iti 3,000 nga ektaria ti mapaspasayakan,” kinuna ni Alcala iti ibibisitana itay nabiit iti probinsia.

Nagiwaras pay ni Alcala iti tseke para kadagiti proyekto iti Ilocos Sur kas iti Municipal Food terminal ti Sto. Domingo (P462,000), Onion Hanger Storage ti Bantay (P1.3 a milion), Plastic Covered Fish Hatchery ti Caoayan (P700,000) ken dadduma pay a proyekto iti agrikultura.

Nangited pay iti 20 nga scholarship grant kadagiti estudiante iti Animal Production NC II a baro a kurso iti Ilocos Sur Community College; sabali laeng ti lima a mannalon a naikkan iti nuang ken kompleto a ramit iti panagtalon. (Mancielito S. Tacadena)

(Bannawag, Agosto 8, 2011 a bilang.)

No comments:

Post a Comment