Indatag itay nabiit ti San Miguel Corp. ti singasingna iti Department of Public Works and Highways a panangyatiddogna iti Tarlac-Pangasinan-La Union Expressway, wenno TPLEx, agingga iti Ilocos Sur wenno iti nayon a kaattiddog a 100 a kilometro.
Kinuna ni San Miguel president Ramon Ang a mangrugi ti singasing a nayon a 100 a kilometro manipud iti Rosario, La Union ken agpatingga iti umuna nga ili ti Ilocos Sur iti abagatan, ti Tagudin.
Nangrugi ti pannakaaramid ti TPLEx idi 2010 iti tallo a paset. Nalpas ti umuna a paset idi Abril 2014 (Tarlac City-Carmen, Pangasinan). Ti maikadua (Carmen-Urdaneta), nalpas idi Disiembre 2014. Ti maikatlo a paset (Urdaneta-Rosario, La Union), manamnama a malpas itoy a tawen.
Pinagbalin ti TPLEx a naparpardas ti biahe manipud iti Tarlac City agingga iti Gerona manipud iti 45 a minuto iti 10 a minuto. Ti biahe manipud iti Tarlac City agingga iti Paniqui, Tarlac, manipud iti maysa nga oras, nagbalin a 15 a minuto. Ti biahe a Tarlac-Rosales, manipud iti dua nga oras iti 30 a minuto, ken ti Tarlac-Urdaneta, ti dua nga oras, nagbalin a 30-40 a minuto.
Proyekto ti Private Infra Development Corp. (PIDC) ti TPLEx iti babaen ti Build-Transfer-Operate (BTO) Scheme iti babaen met ti Build-Operate-Transfer (BOT) Law. Agpapada a Filipino ti akinkukua kadagiti kompania a nangbukel iti PIDC nga idauluan ti Rapid Thoroughfares Inc. (kukua ti SMC). Kakadua ti Rapid Thoroughfares Inc. ti Grand Trackway Holdings Inc., DMCI Holdings Inc., ken D.M. Consunji, Inc., kas partner.
(Naipablaak iti Hunio 18, 2018 a bilang.)
No comments:
Post a Comment