June 26, 2018

Libre a kolehio, saan laeng a kadagiti SUCs, LUCs --CHED

Inlawlawag ti Commission on Higher Education (CHED) nga adda pay dagiti sabsabali a pagadalan a mangited iti libre nga edukasion a saan laeng a dagiti kolehio ken unibersidad ti gobierno.

Mainaig daytoy a pakaammo ti CHED iti kaadu dagiti saan a nakastrek nga agbasa kadagiti kolehio ken unibersidad ti gobierno gapu iti kinaiget ti panagawat dagitoy kadagiti sumrek nga agbasa.

Kuna ni CHED Officer-in-Charge (OIC) ken Spokesperson J. Prospero De Vera III a panggep ti Republic Act 10931 wenno ti “Universal Access to Quality Tertiary Education Act (UAQTEA) ti mangipaay iti adu a pagpilian dagiti estudiante a kayatna ti makapagkolehio.

Mairaman dagitoy nga estudiante kadagiti saan a nakastrek kadagiti State Universities and Colleges (SUCs) ken kadagiti Local Universities and Colleges (LUCs) gapu iti naig-iget nga admission policies a gapu met iti pannakaisayangkat ti Free Higher Education Law. Iti agdama, sakupen ti UAQTEA dagiti amin a 112 SUCs ken 78 LUCs nga akreditado ti CHED. Namnamaen ti CHED a mapan a 1.4-milion nga estudiante ti mabenepisiaran iti RA 10931 a maisayangkat manipud iti Academic Year (AY) 2018-2019. Nupay kasta, saan a mabalin nga awaten dagitoy a public HEIs dagiti amin nga aplikante ta malimitaranda segun iti kapasidadda.

Kuna ni DE Vera a dagiti estudiante a saan a makastrek kadagiti SUCs wenno LUCs, mabalin a mangalada iti Technical-Vocational Education and Training (TVET) a sakupen met laeng ti RA 10931 iti babaen ti Technical Education Skills and Development Authority (TESDA).

Dinakamat pay ni De Vera dagiti dadduma a component ti RA 10931 a mangipaay pay iti gundaway kadagiti estudiante a makatuloy iti kolehio. Kas pagarigan ti Tertiary Education Subsidy (TES) wenno grants-in-aid component a mabalin a makaakomodar iti 300,000 a benepisiario nga estudiante kadagiti pribado nga unibersidad.

Mabalin pay nga agaplay dagiti estudiante para iti nailian nga Student Loan Program (SLP), a maysa pay a component ti free higher education law.


(Naipablaak iti Hulio 2, 2018 a bilang.)


No comments:

Post a Comment