Ginutigot ti Department of Interior and Local Government (DILG) dagiti local government units (LGUs) a mangipatakder iti bukodda a 911 emergency call centers tapno mapapartak ti rescue operations kadagiti nakaro a situasion.
Kuna ni DILG officer-in-charge (OIC) Eduardo M. Año a daytoy nga addang ket panangsuportar iti pannakapirma itay nabiit ti executive order a nangpasingked iti 911 a kas national emergency hotline number ti pagilian.
Iti pannakapirma daytoy, impanamnama ni Año iti publiko ti ad-adda pay a napasayaat a serbisio nga emerhensia a tulong iti pannakatiped ti krimen, kinalinak ken kinatalged ti publiko.
Ginutigotna pay dagiti dadduma nga ahensia ti gobierno ken LGUs a mangipapaay iti emerhensia a tulong a dagus nga ikonektarda ti sistemada iti 911 tapno maaramid daytoy a maymaysa nga emergency hotline number. Kunana a saan koma a matikaw ti publiko iti nagadu a hotline number. Kas imbilin ni Presidente Duterte, ti koma laeng 911 ti maymaysa a numero a para iti para emerhensia a tulong.
Idi Mayo 25, pinirmaan ni Presidente Duterte ti Executive Order No. 56 a mangibilbilin iti pannakaipatakder ti emergency 911 hotline a kas nationwide emergency answering system, kas sukat ti Patrol 117.
Iti agdama, adda walo nga emergency call centers iti sibubukel a Filipinas nga addaan iti 169 nga empleado a mangiwarwardas iti 911 emergency calls.
Dinakamat ni Año a masapul a maawat ti tunggal Filipino ti tulong kadagiti narikut a situasion uray kadagiti kasusulinekan a lugar. Masapul ngarud nga ipagruna dagiti lokal a gobierno ti pannakaipatakder dagiti lokal a 911 call centers tapno masigurado ti madagdagus nga emerhensia a tulong, kas kuna ni Año.
Binallaagan met ti DILG chief ti publiko kontra kadagiti sinsinan ken kalokuan nga awag iti 911 ta addaan iti maitutop a dusa ti kastoy nga aramid, kas sagudayen ti linteg.
(Naipablaak iti Hunio 25, 2018 a bilang.)
No comments:
Post a Comment