November 14, 2016

Trump, maika-45 a presidente ti US

Ginibusan ni Donald Trump ti 8 a tawen a panagari dagiti Demokrata iti gobierno ti Estados Unidos ti Amerika iti panangabakna a kas maika-45 a presidente ti kabilegan a pagilian iti lubong iti eleksion ti Amerika a naangay idi Nobiembre 8.

Inlugesna iti eleksion presidensial ni Hillary Clinton, asawa ni dati a Presidente ti Amerika Bill Clinton, a nangipakita met a di pay nakasagana ti Amerika a maaddaan iti babai a presidente.

Inkari ni Trump, kalpasan ti panangabakna, nga agbalin isuna a presidente dagiti amin nga Amerikano ket kiniddawna kadagiti amin nga Amerikano nga agkaykaykaysada koma ken lipatendan dagiti pinnasakit bayat ti kampania.

Malagip met a bayat ti kampania, inkari ni Trump a mangaramid iti pader iti nagbedngan ti Amerika ken Mexico tapno malapdan ti ilegal nga ibaballasiw dagiti Mehikano iti US ket dagiti met laeng Mehikano ti agbayad iti magastos iti pannakaaramid ti alad. Innayonna a daytoy ti umuna nga asikasuenna iti umuna met nga aldawna iti White House.

Inkarina pay a papanawenna amin a saan a dokumentado nga imigrante iti America ken dina pastreken dagiti Muslim iti beddeng ti Amerika “agingga iti ditay ammo ti mapaspasamak”—a kayatna a sawen, gapu kadagiti riribuk nga ar-aramidem ti ISIS iti Amerika.

Iti biang ti Filipinas, kinablaawan ni Presidente Duterte ni Trump. Kinuna ni Duterte iti mensahena a mangnamnama a mapasayaatda ti relasion iti nagbaetan ti Filipinas ken Amerika.

Sakbayna, naidildilig ni Duterte ken ni Trump gapu iti awan sawsawir ti dila ni Duterte nga agsao a kas met laeng ken ni Trump.


(Naipablaak iti Bannawag, Nobiembre 21, 2016 a bilang.)

No comments:

Post a Comment