Mamati ni Department of Agriculture (DA) Secretary Manny Piñol a kalpasan ti tallo a tawen, addan umdas a bagas ken dadduma pay a produkto iti agrikultura para iti pagilian.
Kuna ni Piñol a naidatagen ti plano ken ni Presidente Rodrigo Duterte no kasano a magun-od daytoy.
Segun iti Sekretario, masapul ti 64-bilion a pisos a badyet para iti nasao a plano.
Nupay maibilang ti panagangkat iti bagas kas pangdarasan a solusion iti tiempo ti El Niño ken La Niña, no itultuloy daytoy kadagiti kadawyan a tiempo, maapektaran dagiti mannalon ket mabenepisiaran dagiti negosiante ken kartel.
Kas solusion, panggep ni Piñol a tuladen ti ar-aramidenda idiay Mindoro a dagiti 14,000 a mannalon, pagtitinnulonganda a talonen ti 400 ektaria a daga ket direkta a mabenepisiaranda iti bukodda nga apit.
Inggunamgunamna met a nakasagana ti departamento a mangipabulod iti 1-bilion a pisos nga awanan interes iti tunggal probinsia iti pagilian nga addaan kadagiti nalalawa a di masuksukay a dagdaga a pakaipadasan daytoy a proyekto.
(Naipablaak iti Bannawag, Agosto 8, 2016 a bilang.)
No comments:
Post a Comment