Kas paset ti addang a mangpaisardeng iti contractual employment iti pagilian, kinuna ni Dept. of Labor and Employment (DOLE) Secretary Silvestre Bello III a binilinnan dagiti rehional a direktor ti DOLE nga ilistada dagiti amin nga aktibidad a mainaig kadagiti kontraktual a mangmangged iti sakupda, nangruna kadagiti illegal a porma daytoy a kas iti ‘endo’ wenno end of contract.
Innayon ni Bello a kalpasan ti nasao nga imbentario, iwayatda ti naiget a pannakaipatungpal dagiti probision ti linteg maipapan iti ‘endo’ ken contractualization.
Iti babaen ti ‘endo,’ maulit-ulit ti empleado a magibusan ti kontratana sa met laeng maawat iti isu met laeng a trabaho iti isu met laeng a kompania, ngem awanan iti posibilidadna nga agbalin a regular.
Kuna ni Bello a saan a mapanuynoyan ti kastoy iti babaen ti panangidaulona. Innayonna nga iti umuna a 100 nga aldaw ti panangidaulona iti departamento, target daytoy a maibaba ti kontraktualisasion iti 50 a porsiento.
(Naipablaak iti Bannawag, Hulio 25, 2016 a bilang.)
No comments:
Post a Comment