Ni LINDA T. LINGBAOAN
DAKKEL ti akem ti Bannawag iti biagko idi makabasaakon ta daytoy ti linawas a gatangen ti amak (agraman ti kabsat a nagasin ti Bannawag a Liwayway), malaksid laeng iti inaldaw a pagiwarnak. No sumangpeten ti tunggal isyu, agiinnunakami a manggammat iti kopia ket no siak ti maudi, makisirsiripak kadagiti kakabsatko nga umun-una a makaiggem. Komiks idi ti paboritok ta atitiddog idi dagiti salaysay, sarita ken nobela para iti ubing nga agsursuro pay laeng nga agbasa. Nauneg met unay kaniak dagiti daniw, isu a diak inin-intonaran. Narabaw ti lengguahe ti komiks malaksid nga adda pay ladawanna isu a nalaklaka nga awatek idi damok ti agbasa.
Ngem dakkel gayam ti epekto daytoy ta isu ti nagpangalak tapno masursurok nga ayaten ti panagbasa. Ket bayat ti panagdakkelko, umad-adu met ti kabaelan ti utekko a sagepsepen. No malpasko idin ti komiks, mapanakon kadagiti at-atiddog a sarita. Saanak pay unay a managbasa idi iti salaysay ta ad-adda nga agbibiagak pay laeng iti lubong ti imahinasion ket awan ti bibiangko kadagiti pakaseknan ti pudpudno a lubong.
Idi agkolehioak, ad-addan nga Ingles a magasin ti basbasaek ta kalatak idi ti Ingles a kas unibersal a lengguahe ket kas tin-edier a dina kayat ti maudi iti uso uray pay biddut, nakibagayak met iti basbasaen dagiti kataebko nga agbasbasa iti siudad. Tunggal bakasion laengen nga agbakasionak a makabasbasaak iti Bannawag.
Ngem idi nagsubliak iti probinsiami tapno agisuroak, nagsubliak iti sidong dagiti barkadak a nabati iti probinsia. Malagipko nga iti naminsan a panagtitiponmi, maysa kadagiti barkadak ti katawa a katawa bayat ti panagbasana iti Bannawag. Ket idi kuan, agiistoriadan. Impagarupko idi no asino a kailianmi ti pagtsitsismisanda. Idi damagek no asino dagitoy, dagiti gayam karakter ti “Fighting Pogi” a nobela ni Apo Dionisio S. Bulong ti pagsasaritaanda! Ditoy manen a napikar ti interesko nga agbasa iti Bannawag. Kas iti magasin, adu metten ti naglabasak ngem manipud idi agingga ita, agbasbasaak pay laeng iti Bannawag.
Ket itoy a panawen, nakitak met ti in-inut a panagbaliw ti format ti magasin no maidilig iti napalabas-- banag a pagkunaak a sumursurot ti magasin iti agus ti biag dagiti agbasbasa. Nupay ab-ababa ita ti kaaduan a nagunegna, umad-adu ken agduduma ketdi ti linaonna.
Idi kaubingko, ad-adu pay laeng ti panawen dagiti nataengan nga agilad ken aglangkapi. Ngem gapu iti ipapardas ti amin a banag ken yaadu dagiti mabalin nga aramiden, bumasbassit ti oras ti tao nga agbasa. Dardaras ngarud a basaen dagiti artikulo nga ababa ngem nabagas.
Ket panagkunak, daytoy a galad ti Bannawag ti gapu a nasanikar latta daytoy, ken agtultuloy ti iruruarna iti laksid ti panagraira ti kabaruanana a teknolohia ti panagipablaak. Kudos iti editorial staff!—O
(Naipablaak iti Bannawag, Nobiembre 4, 2013 a bilang.)
No comments:
Post a Comment