October 13, 2013

Bassiten ti nabati a kabakiran ti PH

Gapu ta agtaltalinaed ti panagpeggad ti nakaparsuaan iti pagilian, kiniddaw ni Senator Grace Poe ti madagdagus ken napinget a panagtignay ti gobierno tapno masigurado a maaywanan a nasayaat dagiti natural a rekursos wenno kinabaknang ti Filipinas.

Iti indatagna a Senate Resolution No. 235, kiniddaw ni Poe iti Senado a maitudo koma ti aktual a kasasaad ti nakaparsuaan iti pagilian ta ti biodibersidad iti Filipinas ti maysa kadagiti agpegpeggad iti lubong, ken dua a porsiento laengen a korales daytoy ti addaan iti nasayaat a kasasaad.

Dinakamat pay ni Poe ti report ti Department of Environment and Natural Resources (DENR) a mangibagbaga a ti Filipinas ti maikadua a pagilian iti Southeast Asia a bassiten ti nabatbati a kabakiranna.
Segun iti report, dakkelen ti nakissay iti kabakiran ti Filipinas iti napalabas a 100 tawen; manipud iti 30-milion nga ektaria, addan laengen iti 7.2-milion nga ektaria.

Segun ken ni Poe, adu a marigrigat a Filipino ti mangnamnama iti natural a kinabaknang kas pagbiaganda ken napateg a masalakniban dagitoy tapno masigurado nga amin a Filipino, agnaar iti dumurdur-as nga ekonomia ti pagilian.


(Naipablaak iti Bannawag, Oktubre 21, 2013 a bilang.)

No comments:

Post a Comment