Agawat ti Canada iti ad-adu pay a Filipino para iti 14,000 a bakante a trabaho

Adu a trabaho ti agur-uray kadagiti Filipino nga agpangpanggep nga agtrabaho idiay Canada kalpasan ti pannakapirma ti Memorandum of Understanding (MOU) iti nagbaetan ti Department of Labor and Employment (DOLE) ken ti gobierno ti Canada.

Babaen ti MOU, kuna ni Labor undersecretary Danilo Cruz a ti pannakapirma ti katulagan, luktanna ti adu a trabaho a para kadagiti mangmangged a Filipino nangruna ta sirsirigen ti gobierno ti Canada ti Filipinas ken dadduma pay a pagilain iti Asia tapno mapunnuan ti di nababbaba ngem 14,000 a bakante a trabaho iti Saskatchewan tapno makaaguanta ti panagkasapulan iti obrero ti agdurdur-as nga ekonomiana.

Kuna ni Cruz nga iti napalabas nga uppat a tawen, nagbalinen ti Filipinas a kadakkelan a paggapuan iti imigrante ken temporario a mangmangged iti Canada; linabsannan ti China ken India a kadawyan a paggapuan dagiti mangmangged para iti nasao a pagilian.

Itay Oktubre 7, pinirmaan da Cruz ken dagiti pannakabagi ti probinsia ti Saskatchewan nga indauluan ti Premier daytoy a ni Brad Wall ti MOU a mangpasayaat iti probision ti sigud a MOU iti nagbaetan dagiti dua a pagilian idi 2006.

Ilayon metten dagitoy nga opisial ti Canada ti agbirok iti mangmangged para iti umuna a 150 a bakante a trabaho.

Segun ken ni Wall, mapan a 3,000 a Filipino ti tinawen a sumsumrek iti Canada ket adu latta ti bakante.
Innayon daytoy nga ipangruna dagiti employer iti Canada a pilien dagiti Filipino gapu ta kabaelanda ti agsao iti Ingles ken makapnek ti panagtrabahoda.

(Naipablaak iti Bannawag, Oktubre 21, 2013 a bilang.)