P100-milion, inlatang ti DepEd para kadagiti IPs

Mapan a P100-milion ti inlatang ti Departamento ti Edukasion para iti programa iti edukasion para kadagiti katutubo wenno Indigenous Peoples (IPs) iti pagilian iti School Year 2013-2014, kas naammuan ken ni National Center for Indigenous Peoples Chairperson Zenaida Brigida H. Pawid.

Ti nasao a programa iti edukasion ti pangipaneknek ti DepEd iti panangitandudona kadagiti kalintegan dagiti IPs a maaddaan iti edukasion a mangrespeto iti identidadda ken tawidda a kultural.

Iti mapattapatta a 94.01-milion a populasion ti Filipinas iti agdama, mapan met a 9.4-milion ti dagup dagiti IPs wenno 10 porsiento iti sibubukel a populasion.

Mismo a ti Konstitusion ti Filipinas, raemen ken salaknibanna dagiti kalintegan dagiti IPs a mangsaluad ken mangparang-ay kadagiti kultura, tradision ken institusion dagitoy.

Daytoy ti gapuna a napanday ti Akta Republika 8371 nga am-ammo pay a kas Indigenous Peoples Rights Act (IFRA) of 1997 a manggarantia iti karbengan dagiti IPs kadagiti bukodda a daga, panangiturayda iti bukodda a komunidad, ken pannakaraem dagiti karbenganda a kas tao.

Malaksid iti RA 8371, pinaboran pay ti Filipinas ti United Nations Declaration on the Rights of Indigenous Peoples idi 2007—kas pangipaneknekna iti ayatna a mangsaluad ken mangpadur-as iti kabibiag agraman iti kultura ken tradision dagiti IPs.


(Naipablaak iti Bannawag, Septiembre 9, 2013 a bilang.)