Mapan agpabuya dagiti kameng ti GUMIL Oahu nga idauluan ni Rizal O. Fernandez iti isla ti Maui inton Septiembre 14, 2013. Maaramid ti pabuya a napauluan iti “Rabii ti Kultura Ilokana” iti Binhi at Ani Maui Filipino Cultural Center, Kahului, Hawaii.
Maitampok iti pabuya dagiti Sala-Polka ti Kailokuan, Kinnantaran, Sinnaitan, Daniw ken Bukanegan. Pangalimpatok a pasetna ti pannakaipabuya ti Sarsuela Ilokana a napauluan iti “Biag ni Sakada, Tallo a Dekada,” a sinurat ni Ric Agnes a kolumnista ti Bannawag.
Pakasaritaan daytoy ti tallo nga agkakapurokan iti Ilokos nga immay nakitegged iti kaunasan ken kapiniaan iti Hawaii idi 1940s. Nagrubuatda idiay Puerto Salomague, Cabugao, Ilocos Sur idi Abril 11, 1946.
Nagduduma ti nagpasaran a rigat dagiti tallo. Nabati iti isla ti Oahu ni Dalmacio, naidestino ni Marcelo iti isla ti Maui, idinto a naibaonni Alfredo iti Hawaii Grande (Big Island). Saan a naanusan ni Dalmacio ti agtrabaho ti kaunasan. Napan kadagiti kampo dagiti padana a trabahador, agbirok ti kasugalna, agingga a nagbalin a mangimaton iti pallotan ken pagsasalaan. Nagbalin met ni Marcelo a dadaulo ti Union dagiti mangmangged, isu a nabayag a saan a nagbakasion ta amangan no saanen a makasubli ta nakamarkan ti naganna iti imigrasion. Impasnek ni Alfredo ti nangged tapno daras makaurnong ti gastuenna a mapan mangikallaysa ken ni Rosario a nobiana. Ngem idi nagawid, masikog metten ti dati a kaayan-ayatna.
Daytoy a panagpabuya ket pangparnuay iti pondo a mangitultuloy iti programa ti GUMIL Oahu nga “School in the Barrios” a mangtulong kadagiti nakurapay a pagadalan iti Kailokuan. Dagiti Head Teachers ti Daoidao Elementary School, San Juan, Abra ken Suso Elementary School, Santa Maria, Ilocos Sur ti nangisuraten iti Presidente ti gunglo ti kalikagumda a mairaman nga umawat iti saranay iti Tawen 2014.
(Naipablaak iti Bannawag, Septiembre 9, 2013 a bilang.)
No comments:
Post a Comment