Huwaran Awardee

Ni Eliseo B. Contillo

Naipaay ti 2013 Huwaran Award para iti benneg ti Media/Radio ken ni Rey "Boboy" Patao babaen ti Kalayaan Philippines Hawaii International (KPHI) gapu iti balligina iti tay-ak ti panagirakurak ken panagbalinna a napintas a pagwadan iti nasao a tay-ak kadagiti kadaraan nga agnaeden iti Estado ti Hawaii.
Naangay ti programa idi Agosto 31, 2013 iti Pacific Beach Hotel a nakapilian ti tema ti programa para itoy a tawen  a "Championing Cultural Education Among Youth."

Nalatak ni Rey (Boboy P ti awag kenkuana dagiti kakabagian ken kasingedna) gapu iti inaldaw a programana iti radio a "Linglingay iti Sardam" iti KNUI AM 900 iti babaen ti Pacific Media Group a maipatpatangatang iti Maui ken kabangibangna nga isla iti Hawaii a pakaipatayaban kadagiti kaudian a damag manipud iti Filipinas  ken dagiti samiweng ti Kailokuan. Ti nasao a programa ti maysa kadagiti nagbalin a rangtay dagiti Ilokano iti Hawaii ken iti sangalubongan tapno makapagsisinningedda gapu ta naka-stream live ti nasao a radio program.

Nakatulong pay ti programa iti ad-adda a pannakaital-o ti kultura ken kannawidan ni Ilokano iti ballasiw-taaw babaen ti pannakaiwaragawag dagiti nabalitokan a kannawidan ken kababalin agraman dagiti gapuanan dagiti mabigbig nga Ilokano iti  sangalubongan.

Kas pammadayaw ken ni Rey, naipaay kenkuana ti maysa a Plake ti Pammigbig manipud iti KPHI  ken tallo a Sertipiko ti Pammigbig a pirmado da Hawaii Gov. Neil Abercrombie ken Honolulu Mayor Kirk Caldwell.
Iti mensahe ni Gob. Abercrombie, kinunana a, "Sipapannakkel ti Estado ti Hawaii iti dakkel a kontribusion dagiti Huwaran Awardees iti pannakapabaknang ti nagtitinnawidan a kultura iti Hawaii. Agtultuloy nga ilalaenmi dagitoy a tradision a nagbalinen a napateg a paset ti panagbiagmi..."

Ni Ben Pulido ti presidente ti KPHI. Mairaman kadagiti programa nga isaysayangkat ti grupo ti pannakaipaay ti Scholarship Program kadagiti agtutubo iti Filipinas, pannakaangay ti Mrs. and Ms Teen Kalayaan Hawaii Filipinas, pannakabigbig dagiti Sakada, ken pannakasaranay dagiti ospital, foundation, ahensia ti gobierno, Simbaan, unibersidad, ken dadduma pay nga organisasion a nakabase iti Filipinas.

Agduyos iti arte ken musika, potograpia ken videograpia, naipasngay ni Boboy P kada Eugenio ken Arsenia Patao ti Aggay, Bantay, Ilocos Sur. Nagpa-Hawaii idi 1987, dua ti bungada ken Melanie a kaingungotna, da Tyler ken Trisha.


(Naipablaak iti Bannawag, Septiembre 16, 2013 a bilang.)