Insayangkat ti GUMIL Filipinas ti maysa a webinar a para kadagiti module writers, mannursuro, estudiante, ken mannurat nga Ilokano iti panagusar ti umisu nga ortograpia ti Ilokano iti panagisagana kadagiti modiul a para iti Mother Tongue-Based Multilingual Education (MTB MLE). Naipabuya daytoy iti live iti opisial nga FB page ti GF idi Oktubre 24.
Ti webinar ti umuna kadagiti serye ti online seminar iti pagsasao ken panagsurat iti Ilokano a kas paset dagiti aktibidad iti Dap-ayan 2020, wenno ti tinawen a literary workshop-seminar ken nailian a kombension ti gunglo.
Naisayangkat ti webinar babaen ti pannakitinnulong ti Schools Division Office ti Siudad ti Laoag, ti DWAT radion ken ti Stremtech Ilocos a nangipatangatang iti webinar babaen ti live streaming.
Ni Assistant Regional Director ti Region 1 Ronald B. Castillo ti nagpaay a Keynote Speaker. Inruanganna ti diskusion iti panangusar iti istandard nga ispeling ken gramatika ti Ilokano babaen ti panangilanadna iti konteksto ti panagsurat iti modiul a para ti MTB-MLE iti Ilokano kadagiti pagadalan.
Nagpaay a lektiurer da Joel Manuel ken Aileen Rambaud, agpada a mannurat ken prinsipal iti Ilocos Norte. Nagsarunoda a nangisuro iti kinapateg ti umisu a panagaramat iti ortograpia iti kontektualisasion kadagiti learning material iti Ilokano.
Babaen ti PowerPoint presentation, imparang dagiti lektiurer dagiti masansan a biddut iti ispeling, gramatika ken pannakaipatarus dagiti balikas nga Ilokano kadagiti nasurat ken naiwarasen nga LM kadagiti pagadalan. Nangipaayda pay kadagiti wagas no kasano a maatur dagiti biddut ken tips para iti nasayud a kontekstualisasion.
Nagpaay met a host ti webinar ni Anna Liza Gaspar, tesorera ti GF.
Umabot iti 500 dagiti nagrehistro para iti webinar, adayo a nangatngato ngem ti namnamaen ti GF a 100 a partisipante a kas kiddawen ti limitasion ti subskripsion ti GF iti video conferencing platform a Zoom. Adda metten nasurok a 3,600 ti nagbuya iti video ken 69 a share, ken 324 a komento manipud naipabuya daytoy iti opisial nga FB page ti GF.
Gapu itoy pakauna a balligi ti webinar, inkari ni Presidente ti GF Remy Albano nga itultuloy ti gunglo nga aramaten ti videoconferencing platform iti tinawen a seminar iti pagasasao ken kurditan ti Ilokano agingga a maibabawi dagiti restriksion iti panagtitipon ken dagiti naiget a pagannurotan iti salun-at nga impaulog ti gobierno gapu iti COVID-19 pandemic.
(Naipablaak iti Disiembre 1-15, 2020 a bilang.
Kadagiti kayatna ti ag-subscribe iti e-Edition, mapan iti ania man kadagitoy a link:
Press Reader: https://bit.ly/2GjO1fK
Magzter: https://bit.ly/2HuG4EO
Magzter: https://bit.ly/2HuG4EO
Para iti naimaldit a kopia, kauman ni Boy Balanag iti CP Number 0916 269 2390
Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment