Pimmusay ni Apo Juan S.P. Hidalgo, Jr., dati a Managing Editor ti Bannawag, idi Oktubre 23 iti tawen daytoy a 84 iti pagtaenganda iti Tomana, Rosales, Pangasinan. Mabigbig a pundador ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, maibilang kadagiti adu a pammadayaw a naawatna a kas mannurat, editor ken agipatpatarus ti Gawad CCP Bilang Pambansang Alagad ng Sining sa Panitikan.
Adu a mannurat ti mangibilang ken ni Apo Hidalgo a kas maysa kadagiti kangrunaan a nangasa iti kinamannuratda manipud pay nagkameng ni Apo Hidalgo iti Bannawag idi Mayo 1, 1961 kalpasan ti uppat a tawen a panagtrabahona iti Diamond Drilling Investigation iti babaen ti National Power Corporation (1958-1961) iti Montalban (Rodriguez itan), Rizal ken iti Norzagaray, Bulacan. Sakbayna, nagpapaay pay nga ekstra iti pelikula ken iti telebision.
Tubo ti Dingras, Ilocos Norte ti ama ni Apo Hidalgo idinto a tubo ti San Juan ken Cabugao, Ilocos Sur ti inana. Inulila ni Apo Hidalgo ti kaingungotna, ni dati a Namnama Garma Prado ti Tangaoan, Piddig, Ilocos Norte ken Alaminos, Pangasinan, nagretiro a propesor ken librarian iti UP Diliman; dagiti annakna a da Maria Bituen (The Netherlands), Patricia Amor (Pangasinan), ken Marie Sol (UP Diliman); ken dagiti mamanugang ken appokona.
(Naipablaak iti Bannawag iti Disiembre 1-15, 2020 a bilang. Kadagiti kayatna ti ag-subscribe iti e-Edition, mapan iti ania man kadagitoy a link:
Press Reader: https://bit.ly/2GjO1fK
Magzter: https://bit.ly/2HuG4EO
Magzter: https://bit.ly/2HuG4EO
Para iti naimaldit a kopia, kauman ni Boy Balanag iti CP Number 0916 269 2390
Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment