Indauluan ni Ronelyn B. Ramones, ti Buyon, Bacarra, Ilocos Norte, dagiti nangabak iti umuna a Salip iti Sarita iti Panawen ti COVID-19.
Pinangabak ni Ramones iti Umuna a Gunggona ti saritana a “Panagawid,” a nangtaming ti padas ti maysa nga ina a nayadayo iti pamiliana gapu iti panagraira ti angol iti Kamanilaan. Awaten ni Ramones ti P7,000 ken sertipiko ti pammigbig.
Daytoy ti kaunaan a salip iti panagsurat iti sarita a mainaig iti angol, ken inisponsoran ni Apo Guillermo Iloreta, tubo ti Sinait, Ilocos Sur, ngem agnaeden iti Sacramento, California.
Maysa a Registered Midwife ni Ramones, writing fellow iti Sarita iti Pasnaan idi 2012 ken nangabaken iti namindua a daras iti salip iti panagsurat iti sarita ti Carlos Palanca Memorial Awards for Literature.
Maikadua a Gunggona ni Clifton Pascua, maysa nga Overseas Filipino Worker (OFW) nga agtrabtrabaho iti Belgium, babaen ti saritana a “Ni Fleur ken Dagiti Un-unnoy ni Anton.” Awaten ni Pascua ti P5,000 a premio ken sertipiko ti pammigbig.
Maikatlo a Gunggona ni Jefferson A. Apolonio, tubo ti Siudad ti Vigan ngem agnaeden iti Maryland, USA, babaen ti saritana a “Dear Diary.” Awaten ni Apolonio ti P3,000 a premio ken sertipiko ti pammigbig.
Nagpaay a hurado da Cles B. Rambaud, Editor ti Bannawag, pangulo; Juan Al. Asuncion, Literary Editor ti Bannawag; ken Dr. Jurlita U. Basuel, retirado nga Education Supervisor iti English ken nangimaton iti MTB-MLE iti Dibision ti Ilocos Norte ti Department of Education.
Maipaayan met iti sertipiko ti pammigbig (consolation prize) ken P1,000 a premio dagiti tallo pay a mannurat a nangabak iti nasao a salip: da Estela Bisquera-Guerrero, ti Tuding, Itogon, Benguet, iti saritana a “Ti Kabusor nga Awan Sukogna”; Danilo A. Bautista, tubo ti Guimod Sur, San Juan, Ilocos Sur, iti saritana a “Ngipen ti Buaya”; ken Marcelino Dumlao Santos, ti Calangcuasan, Salcedo, Ilocos Sur, iti saritana a “Ti Papel ni Limuel.”
Narugian ti salip idi Agosto 15 ken naggibus idi Oktubre 30. Mapadayawanto dagiti nangabak bayat ti kombension nasional ti GUMIL Filipinas itoy a Disiembre.
Inrusat ni Apo Iloreta ti salip a kas pangawisna kadagiti mannurat nga Ilokano a makipaset iti dokumentasion, babaen ti maysa nga ababa a sarita (short story) a pakailagaan ti rikna, kapanunotan wenno reaksion ni Ilokano maipanggep iti daytoy nga angol. Intedna a maaramat a premio ti pagpletena koma nga agawid iti Filipinas ngem saan a natuloy gapu iti lockdown a pinarnuay ti COVID.
Nakitinnulong ti GUMIL Filipinas nga idauluan ni Remy Albano iti pannakaisayangkat ti salip a nagpaayan met a kameng ti Contest Secretariat da Elizabeth M, Raquel, bise presidente; ken Neyo Mario E. Valdez, Sekretario Heneral.
(Naipablaak iti Disiembre 1-15, 2020 a bilang ti Bannawag.Naipablaak iti Disiembre 1-15, 2020 a bilang ti Bannawag. Kadagiti kayatna ti ag-subscribe iti e-Edition, mapan iti ania man kadagitoy a link:
Press Reader: https://bit.ly/2GjO1fK
Magzter: https://bit.ly/2HuG4EO
Para iti naimaldit a kopia, kauman ni Boy Balanag iti CP Number 0916 269 2390
Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
Press Reader: https://bit.ly/2GjO1fK
Magzter: https://bit.ly/2HuG4EO
Para iti naimaldit a kopia, kauman ni Boy Balanag iti CP Number 0916 269 2390
Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment