Saan laeng a nalaing a mannursuro iti Biology ngem maibilang pay ni Dr. Shirley C. Agrupis, Presidente ti Mariano Marcos State University (MMSU) iti Siudad ti Batac, a maysa kadagiti kalalaingan nga agsuksukisok iti benneg ti siensia.
Kas pammaneknek, inyalat ni Dr. Agrupis idi Nobiembre 2019 ti kangangatuan a pammadayaw iti tay-ak ti panangidaulo iti benneg ti panagsukisok iti Filipinas, wenno ti maaw-awagan iti 2019 William D. Dar Research Leadership Award nga impaay ti Philippine Association of Research Managers, Inc. (PHILARM).
Kadagupan amin a nainominar a mabalin a makagun-od iti pammadayaw, ni Dr. Agrupis ti nagballigi gapu kadagiti naidumduma ken namsek a kontribusionna a kas administrador, academician, sientista, ken kakaisuna a nangirugi iti panagsukisok iti benneg ti bioenergy iti sapasap a pagilian.
Ti PHILARM ket maysa a pribado a non-stock ken non-profit nga organisasion a napusgan a mangisaknap ken mangitag-ay ti pannakapadur-as ti akem dagiti manedier dagiti ahensia tapno matun-oyan ti kaadu ti mapartuat a produkto ti panagsukisok.
Masarakan ti opisina ti PHILARM iti pasdek ti Philippine Council for Agriculture, Aquatic and Natural Resources, Research and Development (PCAARRD) iti Los Baños, Laguna.
Ti William D. Dar Research Leadership Award ket maysa a wagas a panangbigbig iti kabaelan ken gapuanan dagiti nalalaing nga agsuksukisok a Filipino a nakatun-oy iti kangatuan (excellent) a grado iti panangidauloda iti aramid a panagsukisok. Iti kasta, ad-adda pay a maitag-ay ti akemda iti tay-ak ti siensia ken agpaayda a modelo kadagiti agngayangay nga agbalin nga agsuksukisok.
Inawat ni Dr. Agrupis ti pammadayaw iti Grand Astoria Hotel iti Zamboanga City bayat ti selebrasion ti 4th International Research, Development and Extension Management Congress ken 29th National PHILARM Convention. (Reynaldo E. Andres)
(Naipablaak iti Enero 16-31, 2020 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment