Pinirmaan da Department of Agriculture Secretary William Dar ken Minister Seong-Hyeok Moon ti Korean Ministry of Oceans and Fisheries (MOF) ti Memorandum of Understanding (MOU) a manamnama nga ad-adda pay a mangpaannayas iti panagtinnulong ti Filipinas ken ti South Korea iti panangpadur-asda ti sektor ti fisheries. Naiwayat ti pinnirma iti fisheries cooperation idi Nobiembre 26 2019 iti Busan, South Korea.
Ti nasao a fisheries cooperation ti bunga ti immuna nga agriculture cooperation napirmaan idi 2018 iti nagbaetan ti Ministry of Agriculture, Food and Rural Affairs (MAFRA) iti ibibisita idi ni President Rodrigo Duterte iti Seoul, Korea.
“Napasnek ti DA a mangpasiken iti relasionna iti South Korea a kas maysa kadagiti kangrunaan nga agang-angkat iti taraon iti sangalubongan nga agdagup iti $30-bilion. Ti South Korea ti maysa kadagiti kangrunaan nga agang-angkat iti Philippine agri-fisheries products,” kinuna ni Dar.
Iti 2018, umabot iti $28-milion ti napastrek ti pagilian iti panaglakona iti fishery products iti South Korea. Mairaman kadagiti kangrunaan nga ilaklako ti Filipinas iti South Korea ti pakairamanan ti tuna, abalone, sea cucumber, kurita, pasayan ken padaw, nadumadua a ruot-baybay, ken carrageenan. (Eliseo B. Contillo)
(Naipablaak iti Enero 1-15, 2020 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment