Indauluan ni Jobert M. Pacnis ti Ballesteros, Cagayan dagiti nangabak iti Maika-8 a Pasalip ALVIYA iti Sarita, kas impakaammo ti Secretariat ti ALVIYA Literary Awards.
Pinangyalat ni Pacnis, mannursuro iti Aparri West National High School, iti Umuna a Gunggona (P20,000 ken sertipiko) ti saritana “Ni Bugi.”
Dagiti kakadua ni Pacnis a nangabak:
Joel B. Manuel ti Banna, Ilocos Norte ken Principal IV iti Cadaratan NHS, Bacarra, Ilocos Norte, Maikadua a Gunggona (P10,000 ken sertipiko) babaen ti saritana a “Reunion.”
Jovito F. Amorin ti Santa Maria, Ilocos Sur, agnaeden ken ti pamiliana iti United Kingdom, Maikatlo a Gunggona (P7,000 ken sertipiko) babaen ti saritana a “Siak ni Juan.”
Jaime M. Agpalo ti Narvacan, Ilocos Sur ngem agnaeden ken ti pamiliana iti Siudad ti Baguio, Maikapat a Gunggona (P3,000 ken sertipiko) babaen ti saritana nga “Everlasting;” ken
Arnold Pascual Jose ti Bacsil Norte, Siudad ti Laoag ngem agnaeden iti Wahiawa, Hawaii, Maikalima a Gunggona (P3,000 ken sertipiko), babaen ti saritana nga “Isuda nga Aw-awaganda iti Bannuar.”
Dagiti naghurado: Ariel S. Tabag (pangulo), Roy Vadil Aragon (kameng) ken Juan Al. Asuncion (kameng).
Panggep ti Pasalip ALVIYA a tumulong iti agtultuloy a pannakaasa ti pluma dagiti mannurat nga Ilokano. Is-isponsoran daytoy ni Alex Vicente Yadao ti Libertad, Abulug, Cagayan ngem agnaeden iti New York City ken imatonan met ni Dr. Freddie P. Masuli, tubo met laeng iti Abulug ngem agnaeden ken ti pamiliana iti Sanchez Mira, Cagayan.
(Naipablaak iti Abril 22, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment