October 2, 2018

SSS, addan bukod daytoy a mobile app

Mabalinen a mastrek dagiti miembro ti Social Security System (SSS) ti bukodda a membership information babaen ti smartphone ken tablet babaen ti baro nga SSS Mobile application.

Kinuna ni SSS President and Chief Executive Officer Emmanuel F. Dooc a nayalnag ti mobile app tapno maipaay kadagiti miembro ti naparpardas a wagas a panangkitada iti personal a rekordda ken dadduma pay a napapateg nga impormasion a saanen a nasken a mapanda pay iti maysa kadagiti sanga ti SSS.

Libre ti SSS Mobile App ket mabalin a patarayen kadagiti smartphone ken tablet nga addaan iti Android 4.4 Kitkat wenno nangatngato ken IOS 8.0 wenno nangatngato. I-download laeng ti app iti Google Play Store ken iti Apple App Store.

Tapno marugian nga usaren ti baro nga SSS Mobile application, ag-log in babaen ti agdama a user ID ken password iti My.SSS account. No met awan pay ti My.SSS account, mabalin ti mangaramid iti baro nga account iti SSS Mobile App babaen ti panang-click iti “Register” iti sidebar ti App.


(Naipablaak iti Oktubre 8, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)


No comments:

Post a Comment